Хто прыдумаў, што ў Беларусі забаранілі замежныя сайты?

120106 Eurafokus.mp3

Пра лічбавую жалезную заслону, за якой з 6 студзеня ўлады схаваюць ад беларусаў інтэрнэт, напісалі вядучыя медыі свету. Вось некалькі прыкладаў:

BBC:
“Belarus puts restrictions on foreign internet sites”

Washington Post:
“Belarus has outlawed browsing foreign Web sites, making visiting or using those sites by its citizens a misdemeanor”.

Forbes:
“Belarus Breaks the Internet, Raises the Digital Iron Curtain”

Mashable (буйны web-рэсурс для it-тэхнолагаў):
“Censorship: Belarus Makes Certain Web Behaviors Illegal”

Еўрарадыё перачытала паведамленне на сайце Law Library of Congress, на які, як на першакрыніцу, спасылаюцца заходнія СМІ. Там напісана літаральна наступнае:

“The newly published Law imposes restrictions on visiting and/or using foreign websites by Belarusian citizens and residents” — “Новы Закон абмяжоўвае наведванне і/ці выкарыстанне замежных сайтаў беларускімі грамадзянамі і рэзідэнтамі”.

Але сам сайт Law Library of Congress як на першакрыніцу інфармацыі спасылаецца на… матэрыял інфармагенцтва “Interfax-Захад”! Выбуховай стала неасцярожная фраза бізнэс-кансультанта Аляксея Шукаева:

“Папраўкі да Кодэкса аб адміністрацыйных правапарушэннях, сярод якіх артыкул 22.16, прывядуць да блакавання Байнэта вядучымі інтэрнэт-парталамі”.

Еўрарадыё зтэлефанавалася з Аляксеем Шукаевым. Ад сваіх слоў бізнэс-кансультант адмаўляцца не збіраецца.

На нашую думку, адна з прычынаў таго, што сусветныя медыі “забаранілі” беларусам інтэрнэт, заключаецца ў нежаданні афіцыйных асобаў патлумачыць журналістам змены ў кодэксе.

Яшчэ перад Новым годам Еўрарадыё звярнулася з запытам у Аператыўна-аналітычны цэнтр. Натуральна, мы прасілі пракаментаваць папраўкі ў Адміністрацыйным кодэксе да 6 студзеня. Адказу дагэтуль няма.

ААЦ і Валерый Цапкала з “Парка высокіх тэхналогіяў” загаварылі толькі 5 студзеня, калі тлумачыць што-небудзь каму-небудзь было ўжо позна. Затое быў самы час апраўдвацца.

Валерый Цапкала: “Для звычайнага беларускага карыстальніка інтэрнэт-фільтрацыя можа ажыццяўляцца толькі па яго ўласным патрабаванні. Ніякіх штрафаў за наведванне замежных вэб-сайтаў не прадугледжана”.

Але за мяжой рэпутацыя Беларусі чарговы раз апынулася сапсаванай.

Фёдар Караленка, стваральнік і кіраўнік праекта “Акавіта”, мяркуе, што справа тут не проста ў “цяжкасцях перакладу” не вельмі ўдалых фармулёвак з беларускага Адміністрацыйнага кодэкса:

Фёдар Караленка: “Няма ў тэксце такога пункту, які можна было б настолькі недакладна перакласці. Я лічу, што перакручванне тут з мэтай прыцягнуць увагу да сітуацыі ў Беларусі, што тут у нас усё пад забаронай”.

На запыт Еўрарадыё ААЦ абяцаў адказаць цягам... наступнага тыдня.

Апошнія навіны

Галоўнае

Выбар рэдакцыі