Халіп вызваляць пасля публікацыі інтэрв'ю з Лукашэнкам у Independent?

Дзмітрый Муратаў: "Мне падалося і рэдакцыі падалося, што мы паспяшаліся са сваімі ацэнкамі. Нам патлумачылі людзі, якія працуюць у беларускім дзяржаўным апараце, што мы надта шмат і надта хутка хочам. Што павінен быць закон, усё гэта павінна быць зроблена, як ён абяцаў. І гэтага не бывае за 2 ці 3 дні. І вы, уласна кажучы, можаце нашкодзіць Халіп, калі патрабуеце ўсяго хутка і неадкладна. Я Халіп сказаў, што дашлю ліст, папрашу прабачэння за паспешнасць. Цяпер мы чакаем".

Галоўны рэдактар "Новай газеты" Дзмітрый Муратаў напісаў ліст да Аляксандра Лукашэнкі. У ім ён просіць прабачэння за паспешныя вывады пра тое, што абяцанне вызваліць Ірыну Халіп апынулася нявыкананым.

Пракаментаваць сітуацыю Еўрарадыё просіць прэс-сакратара прэзідэнта Паўла Лёгкага. Чаму выбачаецца рэдактар Новай газеты? Ці сапраўды Аляксандр Лукашэнка абяцаў вызваліць Ірыну Халіп?

Павел Лёгкі: "Я звязаны пэўнымі абавязальніцтвамі, якіх я, як кіраўнік прэс-службы, абавязаны прытрымлівацца. У мяне ёсць дамоўленасць з Independent. Я гэтую сітуацыю не каментую. Усё што я сказаў, гэта тое, што ніякі Олівер Пул інтэрв'ю ў прэзідэнта не браў. А тое, што датычыцца пытання, якое вы паднялі, я ўсё ж дачакаюся публікацыі інтэрв'ю у Independent, і на падставе гэтай публікацыі, можа быць, нешта скажу".

Тое, што 9 кастрычніка Аляксандр Лукашэнка сапраўды даваў інтэрв'ю The Independent і BBC, Павел Лёгкі пацвердзіў. Гэта ўскосна сведчыць пра тое, што кадры са словамі Аляксандра Лукашэнкі, распаўсюджаныя ў інтэрнэце, сапраўдныя:

Пакуль інтэрв'ю з кіраўніком Беларусі не з'явіцца цалкам у The Independent, нічога не хоча каментаваць Павел Лёгкі. Чакае і "Новая газета".

Еўрарадыё: Я так зразумеў, што былі нейкія дамоўленасці, і толькі калі выйдзе інтэрв'ю, можна будзе пра нешта размаўляць?

Дзмітрый Муратаў: "Я таксама так зразумеў: калі выйдзе інтэрв'ю, можна будзе размаўляць. А ведаеце, што нас збянтэжыла? Чаму спяшаліся? Таму што запіс быў апублікаваны ў Беларусі без фрагментаў, якія тычыліся Халіп. Але, з іншага боку, гэта аўтарскае права ― у якой версіі публікаваць інтэрв'ю. Мы хочам заставацца толькі ў межах закона і стандартаў журналістыкі. Нам сказалі: вы спяшаецеся, гэта падцісканне. Мы кажам: Не, што вы! Вось мой ліст і мая галава, шаноўныя".

Па беларускім тэлебачанні ўжо была паказаная скарочаная версія інтэрв'ю, у якой дыялог пра Ірыну Халіп адсутнічае. Павел Лёгкі ў размове з Еўрарадыё адзначыў, што гэты паказ часткі інтэрв'ю адбыўся па дамоўленасці з брытанскімі праваўладальнікамі.

Павел Лёгкі: "Уся эксклюзіўная інфармацыя, як мы дамаўляліся, знаходзіцца ў руках нашых партнёраў з Independent. І я ў дадзенай сітуацыі чакаю, калі з'явіцца інтэрв'ю. Калі там нешта будзе адсутнічаць, то я пра гэта скажу дадаткова. Тыя кавалкі, якія былі распаўсюджаны ў дзень правядзення інтэрв'ю ― гэта невялікія кавалкі, пра якія мы дамовіліся з нашымі брытанскімі партнёрамі".

Публікацыя у "Новай газеце" наконт нестрыманага абяцання адбылася раней за афіцыйную публікацыю інтэрв'ю, таму і высновы пра нестрыманае абяцанне зробленыя паспешна. Інтэрв'ю яшчэ не апублікавана, а значыць, афіцыйна не агучанае і абяцанне Аляксандра Лукашэнкі. За паспешнасць і выбачаецца перад ім галоўны рэдактар "Новай газеты".

Нагадаем, Ірына Халіп атрымала 2 гады пазбаўлення волі з адтэрміноўкай на два гады.