Чыноўнікам знізяць штраф, які амаль нікому не давалі?
У судзе не могуць прыгадаць, каб нейкага чыноўніка аштрафавалі за парушэнне закона "Аб зваротах грамадзян".
Штраф за парушэнне закона "Аб зваротах грамадзян" могуць знізіць. Аказваецца, за гэта зараз даюць да 20 базавых (2 мільёны рублёў). А як увогуле паскардзіцца на чыноўніка, які не адказаў на зварот?
"У нас на сайце ёсць такое пытанне. І там у рубрыцы "Пытанне-адказ" нашы юрысты адказвалі на яго", — у першую чаргу звяртаемся з пытаннем у Камітэт дзяржкантролю. На сайце сапраўды людзі цікавяцца, якую адказнасць нясе чыноўнік за "адпіску" і несвоечасовы адказ.
Гэта можа быць штраф ад 4 да 20 базавых, паводле Адміністрацыйнага кодэкса. Заўвага, вымова ці звальненне — паводле Працоўнага, — пішуць юрысты КДК.
Па кожным выпадку фармалізма, прадузятых, нетактычных паводзінаў, грубасці і непавагі да людзей неабходна праводзіць праверку, — гаворыцца ў дырэктыве прэзідэнта "Аб мерах далейшай дэбюракратызацыі дзяржаўнага апарата". Вінаватых прыцягваць да адказнасці аж да звальнення.
Але ж куды канкрэтна скардзіцца, так і не зразумела. У пракуратуры раяць пачынаць з самага нізу — у вышэйшую інстанцыю. Калі вас "пакрыўдзілі" ў раённым аддзеле, скардзіцца ў гарадскі, калі ў гарадскім, то ў абласны... Ці ў раённую пракуратуру.
"Калі вы хочаце падаць скаргу, то пачынайце з раёна, пішыце пісьмова ў адвольнай форме, ці ў пракуратуру горада. Думайце самі і самі прымайце рашэнне", — адказваюць у пракуратуры.
Увогуле з такімі пытаннямі нам раяць звяртацца да юрыстаў, напрыклад, у юрыдычную кансультацыю. Выходзіць, самому скласці скаргу правільна і накіраваць яе па адрасе не так проста, як падаецца. Таму з пытаннем ідзем да юрыста Алены Танкачовай, якая сходу тлумачыць:
"У пракуратуру ці суд па месцы знаходжання дзяржоргана. Пракуратура можа ўстанавіць факт парушэння закона. І вынесці ў межах мер пракурорскага рэагавання прадпісанне — устанавіць факт парушэння і змусіць орган даць адказ на ваш зварот. Калі ваша мэта — атрымаць адказ, то гэта мера пракурорскага рэагавання. Калі ваша мэта — толькі штраф, то ў судовым парадку".
У судах жа не прыгадваюць, каб такія справы разглядаліся. Відаць, не шмат нашы грамадзяне звяртаюцца туды, каб пакараць чыноўнікаў. За апошні год не ўзгадваюць такіх справаў у канцылярыі аднаго з мінскіх судоў.
"Наколькі мне вядома, у бліжэйшыя пару гадоў, напэўна, не было. У бліжэйшы год у нашым судзе такога дакладна не было..."
Галоўная прычына гэтага, хутчэй за ўсё, у тым, што грамадзянам важней атрымаць адказ, а не пакараць чыноўніка штрафам. Не варта забываць, што зварот у суд не бясплатны, а паслугі юрыста, каб скласці скаргу, каштуюць не мала. Але ж дэпутаты плануюць, паміж іншымі папраўкамі, знізіць максімальны штраф у два разы.