Чаму марозіва робяць з сухога малака?

Еўрарадыё заўважыла, што амаль усё марозіва робіцца з сухога малака, пра што сведчаць надпісы на пачках з пламбірам. Чаму, калі надоі ў краіне растуць, выкарыстоўваць менавіта сухое малако?

"Без сухога малака марозіва зрабіць немагчыма, — тлумачаць на прадпрыемстве "Марозпрадукт". — Калі гэта будзе сарбет ці шчарбет, якія на тэрыторыі Беларусі пакуль лічацца марозівам, то там усё роўна будзе 2-3 працэнты сухога малака. Калі зварыць без малака, то атрымаецца не марозіва, а замарожаны дэсерт".

У дамашніх рэцэптах марозіва, змешчаных у інтэрнэце, нідзе сухое малако не сустракаецца. Але як аказалася, без яго не абыходзіцца масавая вытворчасць прадукту. Што праўда, сухое малако тут натуральнае і, паводле слоў кандытараў, амаль не адрозніваецца па ўласцівасцях ад звычайнага.

"Сухое малако — гэта натуральны прадукт, — кажуць на магілёўскім прадпрыемстве "Бабушкина крынка". — Марозіва — гэта такі прадукт, дзе павінны быць абавязкова сухія рэчывы добрыя, каб можна было ўзбіваць. Каб яно было дорай узбітасці, павялічваюць утрыманне сухіх рэчываў — таму складаецца рэцэптура і дадаецца сухое малако".

Няўжо без сухога малака не атрымаецца марозіва?

"Яно будзе, як фруктовы лёд".

Вытворчасць халоднага ласунку рэгулюецца СТБ 1467, там і прапісана мінімальная колькасць сухіх рэчываў, як сухое малако. Часам, калі марозіва шакаладнае, сухое малако часткова замяняецца какавай. Але ёсць розныя рэцэпты.

"Ёсць два варыянты гатунку сумесі для марозіва, — тлумачаць Еўрарадыё на кафедры тэхналогіі малака і малочных прадуктаў Магілёўскага ўніверсітэта харчавання. — Некаторыя працуюць на натуральнай сыравіне, а некаторыя — на сухім малацэ, то бок яны проста аднаўляюць".

Як патлумачылі Еўрарадыё, некаторыя беларускія і шматлікія расійскія вытворцы выкарыстоўваюць толькі сухое малако. Ніякіх сведчанняў шкоднасці гэтага няма і лічыцца, што сухое малако, разбаўленае вадой, зусім не адрозніваецца ад звычайнага. Але не зразумела — навошта, пры такіх высокіх надоях?

"Аб'ёмы зараз вялікія. Раней марозіва выпускалі ў Магілёве і прадавалі ў Магілёве. Цяпер мы можам і брэсцкае купіць, і мінскае. Малако, калі кепска захоўваць, скісне, а сухое можа і паўгода ляжаць, не так залежыць ад сезоннасці. Калі закупляюць сухое малако, ужо не прывязаныя да сыравіннай зоны", — кажуць на кафедры тэхналогіі малака і малочных прадуктаў.

Таму з асушаным малаком вытворцам працаваць прасцей. Яго таксама дадаюць у маянэз і ёгурт, ну і часам можна сустрэць малако — адноўленае з сухога.

У Польшчы таксама дадаюць у марозіва сухое малако — напрыклад, вядомая польская фірма Grycan. На предприятии "Бабушкина крынка" Еўрарадыё распавялі, што ў Расіі амаль 90 працэнтаў фабрык працуюць на сухім малацэ.