БХК просіць Генпракуратуру праверыць інфармацыю аб катаваннях Саннікава
Падставай для звароту Беларускага Хельсінкскага камітэту стала інфармацыя, агучаная жонкай экс-кандыдата ў прэзідэнты Ірынай Халіп.
Халіп распавяла, што падчас спаткання ў віцебскай калоніі "Віцьба-3" 24 студзеня муж паведаміў ёй, што пад уздзеяннем катаванняў вымушаны быў напісаць на імя Лукашэнкі прашэнне аб памілаванні. Па словах Халіп, з 16 па 20 лістапада з Саннікавым, які ў той момант знаходзіўся на перасылцы ў магілёўскай турме, адбывалася "нешта жудаснае".
БХК просіць Генпракуратуру правесці праверку інфармацыі аб катаваннях над Саннікавым і падаць публічную інфармацыю па яе выніках. У выпадку неабходнасці адпаведна адрэагаваць, інфармуе БелаПАН.
Нагадаем, што Андрэй Саннікаў
у траўні мінулага года быў прысуджаны да пяці гадоў пазбаўлення волі ў калоніі
ўзмоцненага рэжыму. Яго абвінавацілі ў арганізацыі масавых беспарадкаў 19 снежня
2010. Міжнародная грамадскасць лічыць Саннікава палітвязнем і патрабуе ад
афіцыйнага Мінска яго неадкладнага вызвалення.
