Беларускі “Твітар” дарос да ўласнай прэміі (АЎДЫЁ)
“Прэмія twiby” будзе “хатнімі вячоркамі” для “мястэчковага чаціка”. Байнэт узрушаны, але ганарыцца ўзнагародамі да пенсіі ніхто з патэнцыйных уласнікаў не будзе
26 лістапада ў сталічным WestWorldClub адбудзецца TwiPartyBy — вечарына для беларускіх карыстальнікаў “Твітара”.
“Збіраем менавіта беларускіх твітаранаў. Фармат мерапрыемства — гэта не грандыёзная прэмія, пафасная і сур’ёзная. Хутчэй хатнія вячоркі, толькі ў вялікім маштабе”, — распавядае Еўрарадыё арганізатарка TwiPartyBy Любоў Кавалёва.
Арганізатары абяцаюць, што звычайнага вечаровага кантынгента “шайбы” 26 лістапада ў клубе не будзе. Яшчэ адно адрозненне ад заўсёднай там дыскатэкі — “Прэмія twiby”.
“Будзем узнагароджваць цікавых, яркіх людзей з “Твіта ра” байнэта. То бок, не проста тусоўка, але прэмія. Будуць прызы, і прызы немаленькія. Натуральна, я не буду зараз раскрываць таямніцаў. Але будуць яны немаленькія і па габарытах, і па значнасці”, — працягвае Любоў Кавалёва.
Але традыцыйных намінацый на “Прэміі twiby” не будзе. “Вячоркі” Любоў Кавалёва арганізавала разам са сваімі сябрамі — таксама актыўнымі карыстальнікамі “Твітара”. Усе разам яны і вызначылі, хто атрымае падарункі.
“Пад канкрэтных людзей і рабілі намінацыі. То бок, гэта будуць намінацыі не за лепшае нешта, а намінацыі як шоў”, — тлумачыць Любоў Кавалёва.
Ніякая арганізацыя ці інтэрнэт-медыя за мерапрыемствам не стаіць. На думку медыяэксперта, кіраўніка праекта Gemius Belarus Міхаіла Дарашэвіча, так і мае быць:
Міхаіл Дарашэвіч: “Каб атрымалася добрая і важкая прэмія, яна мусіць быць незалежнай. Пры ўсёй павазе, напрыклад, да TUT.BY — калі ён праводзіць прэмію кантэнт-праектаў — ён, натуральна, параўноўвае гэтыя праекты з сабой. А тут трэба, каб група энтузіястаў арганізоўвала. Тыя, хто проста разбіраюцца ў тым ці іншым пытанні ці тэме, каб узялі ды прыдумалі. І, мне здаецца, чым менш фармальна і забюракратызавана задумана — тым больш цікавая і карысная прэмія”.
Эксперт лічыць, што беларускі “Твітар” для ўласнай прэміі ўжо саспеў, хаця піку сваёй папулярнасці яшчэ і далёка не дасягнуў.
“20 тысяч унікальных карыстальнікаў за дзень. Але, з іншага боку, беларускі “Твітар” — гэта такі вялікі калектыўны чацік, такая ў нас мясцовая спецыфіка. І некаторыя “піянеры” ужо нават ім перасталі карыстацца, і лічаць, што гэта нецікава. А я лічу, што залатыя часы “Твітара” яшчэ наперадзе”, — распавядаем Міхаіл Дарашэвіч.
Па яго словах, зараз “Твітар” у Беларусі толькі пачынае складаць канкурэнцыю іншым сацыяльным медыям — “вКонтакте” ды Facebook. Але ўжо можа пахваліцца пэўнымі вынікамі. Напрыклад, колькасць пераходаў на сайт Еўрарадыё з “Твітара” ужо набліжаецца да колькасці людзей, якія прыходзяць на euroradio.fm праз Facebook.
“Ці вось яшчэ прыклад “Нашай Нівы”: у іх колькасць пераходаў з Facebook прыкладна роўная колькасці пераходаў з “Твітара”, — заўважае эксперт.
Вядомыя беларускія карыстальнікі “Твітара” на навіну пра прэмію адрэагавалі па-рознаму. Адны збіраюцца пайсці на яе, іншыя думаюць, як бы ветліва адмовіцца.
Але з большага ўсе сыходзяцца на тым, што “Прэмія twiby” — гэта, хутчэй, не нагода для пажыццёвага гонару, а добры шанец “патусіць на клубаке”. І на тым, што да росквіта беларускаму “Твітару” яшчэ далёка.
Еўрарадыё апытала самых раскручаных беларускіх твітаранаў. Першым быў “Мядовы гамафобік” @mojo_fm, якога на дадзены момант зафаловіла амаль 2000 чалавек: Ён распавёў, што для таго, каб атрымаць прэмію, ужо прынес у ахвяру чорнага пеўня.
Пасля прыйшла чарга Дзяніса Блішча, якія акрамя папулярнага ўласнага “Твітара” вядзе ленту OnlinerBY амаль на 10 тысяч фаловераў.
І, нарэшце, мы затэлефанавалі @bygirl, чый асабісты “Твітар” чытаюць больш за 4500 чалавек.
