БАТЭ звярнуўся ў спартовы суд Лазаны па "справе Гутара"
Пра гэта паведамляе партал tut.by, які спасылаецца на міжнародна-прававы дэпартамент Беларускай федэрацыі футбола.
Нагадаем, 23-гадовы брамнік Аляксандр Гутар сёлета вырашыў сысці з БАТЭ. Беларуская федэрацыя футбола дазволіла яму датэрмінова разарваць кантракт з барысаўчанамі. Гутар мусіў заплаціць ужо былому свайму клубу 180 тысяч долараў кампенсацыі.
У лютым Гутар падпісаў кантракт з мінскім "Дынама", разлічаны на тры гады.
Яшчэ ў студзені ў заяве ФК БАТЭ адзначалася: "Мы будзем ісці да канца, адстойваючы свае інтарэсы, бо лічым, што
справядлівасць ў пытанні, якое разглядалася, цалкам на нашым баку. Для
нас гэта справа гонару... Што
датычыць Аляксандра, то ён, растаптаўшы адносіны з клубам, які
выгадаваў яго, сапсуе сабе кар'еру, бо як у бліжэйшыя месяцы, а можа
быць, і гады, яго чакаюць пастаянныя разбіральніцтвы ў розных
інстанцыях".
ФК БАТЭ тады заявіў, што не выключае звароту ў Міжнародны спартыўны арбітражны суд у Лазане.
Фота — dinamo-minsk.by