Расійскія выдавецтвы будуць выпускаць сусветныя бестсэлеры ў пераказе

Расійскія выдавецтвы прыдумалі, як абысці заходнія санкцыі, якія не дазваляюць атрымаць правы на выданні сусветных бестсэлераў. Цяпер у Расіі будуць выходзіць пераказы замежных кніг, піша "Камерсант".

У прыватнасці, выдавецтва "Эксмо-АСТ" выпусціць пераказ асноўных тэзісаў мемуараў прынца Гары "Spare" (Запасны). Аналагічнае выданне рыхтуе і выдавецтва Smart Reading.

Гендырэктар "Эксмо-АСТ" Яўген Кап'еў тлумачыць: "У самары будуць адлюстраваныя ключавыя ідэі кнігі без выкарыстання ўрыўкаў з яе: аўтар самары прачытала кнігу па-англійску і пераказала сваёй мовай".

Праўда, не ўсе выдаўцы гатовыя карыстацца такой "шэрай схемай". Яны кажуць, што гэта ўсё адно форма крадзяжу і такія меры не дапамагаюць рэпутацыі сярод заходніх партнёраў.

Беларускі кніжны рынак у вялікай ступені напаўняецца прадукцыяй з усходу. Таму і ў нас, відаць, хутка з'явіцца гэты "паралельны літаратурны імпарт".