Расія пачала фарбаваць "шахеды" ў чорны, каб іх было складаней збіваць

Расіяне пачалі ўжываць ударныя дроны Shahed чорнага колеру, каб ускладніць працу ўкраінскім сілам супрацьпаветранай абароны, піша ўкраінскае выданне Militarny. Фота аскепкаў дронаў, якія ў суботу, 25 лістапада, былі збітыя над Кіевам, апублікавалі ў сацсетках.

Каб асочваць дроны ў цёмны час дня, украінскія мабільныя групы выкарыстоўваюць пражэктары і цеплавізары. Чорныя дроны ім будзе складаней асачыць візуальна. Але справа не толькі ў колеры.

Цяпер расіяне пакрываюць дроны карбонам. Гэты матэрыял паглынае радыёлакацыйны сігнал, кажа спікер Паветраных сіл УСУ Юры Ігнат.

Зрэшты, гэтыя новаўвядзенні не памяшалі ўкраінскім СПА збіць у ноч на суботу амаль усе выпушчаныя расіянамі дроны.