Пуск другога энергаблока БелАЭС запланаваны на першы квартал 2023 года
Беларуская АЭС / Еўрарадыё
Запусціць другі энергаблок Беларускай АЭС плануецца ў першым квартале 2023 года. Пра гэта заявіў міністр энергетыкі Віктар Каранкевіч, перадае прэс-служба ведамства.
"Энергетычны пуск блока, падключэнне яго да энергасістэмы плануецца ў першым квартале 2023 года", — цытуе прэс-служба словы міністра.
Паведамляецца, што гатоўнасць другога блока складае 97%. Гэтую лічбу ведамства называе ўжо некалькі месяцаў. Пры гэтым на энергаблоку працягваюцца планавыя тэхналагічныя работы.
Раней гучалі заявы, што другі энергаблок Беларускай АЭС запусцяць у 2022 годзе. Аднак замест гэтага на паўгода быў выключаны першы энергаблок — з канца красавіка да 9 лістапада. Пасля гэтага Мінэнерга перастала называць дату меркаванага запуску другога энергаблока.
У Мінэнерга заяўляюць, быццам цяпер першы энергаблок БелАЭС працуе на намінальнай магутнасці.
