Поспехі расіян на Данбасе і выбухі ў Крыме — 391-я раніца вайны

У Крыме напярэдадні вечарам прагрымела некалькі выбухаў. У Расіі кажуць пра атаку беспілотнікаў. У Галоўным упраўленні выведкі Мінабароны Украіны — пра тое, што былі знішчаныя расійскія крылатыя ракеты тыпу "Калібр". Іх везлі па чыгунцы. Пры гэтым ва ўкраінскім ГУР не ўдакладнілі, што было прычынай выбухаў. "Загадкавая "бавоўна" прадаўжае працэс дэмілітарызацыі Расіі і рыхтуе ўкраінскую паўвыспу Крым да дэакупацыі", — гаворыцца ў паведамленні ўкраінскай выведкі.

Між тым Сяргей Аксёнаў, прызначаны Расіяй кіраўнік Крыма, заявіў, што "паводле папярэдніх звестак, абломкі пашкодзілі домаўладанне і краму". Адзін чалавек паранены. Расійскія тэлеграм-каналы публікуюць відэа з каментарамі відавочцаў, якія эмацыйна паведамляюць, што "упала на чыгунку".

Нагадаем, "Калібр НК" — гэта ракеты, прызначаныя для пускаў з надводных караблёў расійскага Чарнаморскага флоту. Далёкасць паражэння такой зброі — больш за 2 500 кіламетраў па наземных цэлях і больш за 375 кіламетраў па марскіх.

Да сітуацыі на фронце. Расійскія войскі дасягнулі нязначных поспехаў у Бахмуце і яго ваколіцах. Актывізаваліся расійскія аперацыі і вакол Аўдзееўкі ( гэта таксама ў Данецкай вобласці), адзначаюць у Інстытуце вывучэння вайны (ISW).

"Па стане на 20 сакавіка расійскія войскі, верагодна, дамагліся дадатковых поспехаў на паўднёвым захадзе і поўначы Бахмута, а таксама на паўночны захад ад Бахмута паміж Багданаўкай і Хромавым", гаворыцца ў свежай справаздачы Інстытута. Акрамя таго, з аглядкай на паведамленні ўкраінскага Генштаба, эксперты Інстытута робяць выснову, што "расійскія сілы, верагодна, прасунуліся на захад ад Краснагораўкі (9 км на поўнач ад Аўдзееўкі) і захапілі Стэпавае (на захад ад Краснагораўкі)". Такім чынам, расіяне спрабуюць і тут — каля Аўдзееўкі — стварыць умовы для атачэння населенага пункта. Прычым на гэтым кірунку яны выкарыстоўваюць большую колькасць авіяцыі.

Тым не менш, лічаць у ISW, агульны вясновы наступ Расіі, верагодна, набліжаецца да кульмінацыі. Расійскія войскі імкнуцца актывізаваць намаганні, каб дамагчыся хоць якіх-небудзь поспехаў, перш чым яны страцяць ініцыятыву ва Украіне. "Застаецца магчымым, што расійскія поспехі могуць заахвоціць Украіну сысці з Бахмута і / або Аўдзееўкі, хоць на гэты момант ні тое, ні іншае не ўяўляецца верагодным", гаворыцца ў справаздачы экспэртаў.

Тым часам намесніца міністра абароны Украіны Ганна Маляр нагадала, што на гэтым тыдні заканчваецца другі месяц з моманту абвастрэння баёў за Бахмут. "Ніхто не верыў, што ва ўмовах гэтакіх інтэнсіўных нападаў ворага можна ўтрымаць горад больш за тыдзень, максімум двух. Але дзякуючы мужнасці і гераізму тысяч нашых воінаў, а таксама ўмеламу кіраўніцтву нашых генералаў і афіцэраў — абарона Бахмута трымаецца і магчымасці яшчэ не вычарпаныя", — падкрэсліла яна.

За мінулыя суткі сілы абароны Украіны адбілі больш за 120 нападаў на Бахмуцкім, Аўдзееўскім, Ліманскім, Мар'інскім і Шахцёрскім кірунках, гаворыцца ў ранішняй зводцы Генштаба УСУ. Менавіта на гэтых кірунках расіяне спрабуюць весці наступальныя дзеянні.

Прэзідэнт Украіны Уладзімір Зяленскі звярнуўся да ўдзельнікаў канферэнцыі міністраў юстыцыі краін Еўропы з заклікам падтрымаць міжнародныя намаганні, "каб агрэсар быў дакладна пакараны". Пра гэта Зяленскі распавёў у вячэрнім відэазвароце. На сустрэчы міністраў юстыцыі краін Еўропы абмяркоўвалася стварэнне спецыяльнага Трыбунала і сумесная праца Украіны з Міжнародным крымінальным судом.

"Недастаткова прыцягнуць да адказнасці тых, хто вінаваты ў злачынствах, спароджаных агрэсіяй. Патрабуецца таксама пакаранне — цалкам справядлівае і законнае — за само першапачатковае злачынства, якое спарадзіла ўсе астатнія злачынствы гэтай вайны", — сказаў Зяленскі. Гэтым і павінен заняцца Спецыяльны трыбунал. Украіна настойвае на яго стварэнні.

У Венгрыі абверглі інфармацыю агенцтва Bloomberg аб тым, што краіна наклала вета на публікацыю сумеснай заявы Еўрапейскага Саюза. У гэтай заяве ішла гаворка аб рашэнні Міжнароднага крымінальнага суда (МКС) выдаць ордэр на арышт прэзідэнта Расіі Уладзіміра Пуціна. Пра гэта распавядае the Eastern Gerald.

"Праўда заключаецца ў тым, што Венгрыя абвясціла такую пазіцыю высокаму прадстаўніку ЕС па замежных справах і палітыцы бяспекі Жазэпу Барэлю: Венгрыя прымае да ведама рашэнне МКС і не жадае ніякім чынам яго каментаваць", — заявіў спікер Міністэрства замежных спраў Венгрыі Матэ Пацолай. Ён дадаў, што Будапешт таксама не будзе пярэчыць, калі Барэль або любая з краін ЕС вырашаць выступіць з заявай з гэтай нагоды.

Раней Bloomberg пісаў, што Венгрыя заблакавала публікацыю заявы ЕС. У выніку Барэль быў вымушаны зрабіць заяву ад свайго імя. Bloomberg таксама адзначаў, што пазіцыя Будапешта, імаверна, будзе абвешчаная, калі лідары ЕС сустрэнуцца на саміце ў Брусэлі на гэтым тыдні. Крыніцы агенцтва таксама адзначаюць, што некалькі лідараў, верагодна, будуць заклікаць да больш жорсткіх фармулёвак.  Некаторыя лідары ЕС ужо індывідуальна віталі рашэнне МКС.

Сёння ва Украіну прыязджае прэм'ер-міністр Японіі Фуміа Кісіда. Запланавана яго сустрэча з прэзідэнтам Уладзімірам Зяленскім. Гэта будзе першы візіт кіраўніка японскага ўрада ва Украіну пасля поўнамаштабнага ўварвання Расіі. Пра гэта піша Nippon News Network са спасылкай на японскіх чыноўнікаў. Візіт не быў анансаваны. СМІ адзначаюць, што гэта "вельмі незвычайна" для японскага прэм'ера наведваць замежную краіну без папярэдняга паведамлення. Верагодна, гэта было зроблена з меркаванняў бяспекі.

Чакаецца, што на сустрэчы з Зяленскім Кісіда перадасць намер Японіі прадаўжаць намаганні і прадэманстраваць рашучасць G7 цвёрда падтрымліваць міжнародны парадак. Як прадстаўнік краіны, якая старшынюе ў G7, Кісіда заявіць аб далейшай салідарнасці і падтрымцы Украіны.