Плюсы і мінусы адмены віз для замежнікаў

29 жніўня адразу некалькі тэматычных СМІ паведамілі амаль сенсацыйную навіну — праз некалькі месяцаў Беларусь можа адмяніць візы для грамадзян 80 "добранадзейных" краін. Спасылаюцца выданні на намесніка міністра спорту і турызму Міхаіла Партнога. Маўляў, дакумент ужо падрыхтаваны і знаходзіцца на зацвярджэнні ў Савеце міністраў. Плануецца, што без візы цягам пяці дзён у Беларусі змогуць знаходзіцца грамадзяне 80 краін, у якіх няма вялікіх праблем з мігрантамі. Прыехаць такім чынам у нашу краіну можна будзе толькі паветраным шляхам — праз нацыянальны аэрапорт. Навіна выклікала гучны розгалас. Галоўны рэдактар выдання "Турызм і адпачынак" Лілія Кобзік тлумачыць, што разам з відавочнымі плюсамі новы дакумент можа прынесці і шэраг расчараванняў.

Плюсы

Піяр

"Як піяр-акцыя гэта шыкоўны крок. Гэта шыкоўна нават у тым сэнсе, што краіна неяк загучыць. Гэта будзе піяр не толькі на ўнутраным узроўні, гэта будзе піяр на еўрапейскім узроўні. Пра гэта ўсе СМІ паведамяць", — мяркуе Лілія Кобзік.

Не пагадзіцца цяжка. Навіна аб тым, што Гродна праз два месяцы можа стаць бязвізавай зонай (хаця б на пяць дзён і для арганізаваных турыстаў), ужо некалькі дзён вісіць на большасці польскіх сайтаў.

Штуршок для развіцця турыстычнай сферы ў краіне

Яшчэ адным несумненным плюсам, на думку рэдактара "Турызму і адпачынку", можа стаць штуршок для ўсёй галіны ў краіне. "Турызм вельмі вітае розную дынаміку. Калі хоць нешта ёсць, нешта варушыцца. Не проста стаіць, як вада ў балоце. А нешта робіцца, нешта адбываецца. Магчыма, адменяць візы. І турыстычная галіна можа ўстрапянуцца, з'явіцца нейкая надзея. Гэта таксама добра", — гаворыць ЛІлія Кобзік.

Мінусы

Адсутнасць падрыхтаванай інфраструктуры

Галоўны мінус — слабасць беларускай турыстычнай інфраструктуры. Можа так атрымацца, што натоўпы замежных турыстаў, якія рынуцца пасля адмены віз у Беларусь, сутыкнуцца з тымі ж праблемамі, з якімі сутыкаюцца наведнікі беларускіх частак Белавежскай пушчы і Аўгустоўскага каналу. "На той стадыі развіцця турызму, на якой мы знаходзімся, візы нічога не вырашаюць. Адмена віз — гэта вельмі добра як крок у цэлым ланцужку крокаў, якія ўжо павінныя былі быць зробленыя. Крокі па падрыхтоўцы турпрадукту. Вось мы адчынілі дзверы на Аўгустоўскі канал. Што мы там бачым? Адзін кіёск, які там стаіць. Вагончык", — мяркуе рэдактар "Турызму і адпачынку".

Асцярожнасць гэтага кроку

Яшчэ адна праблема ў тым, што магчымая адмена візавага рэжыму носіць моцна абмежаваны характар. Толькі на пяць дзён і толькі праз Нацыянальны аэрапорт — гэтага можа быць вельмі мала, каб рэальна спрацаваць: "Віз няма. Але іх няма толькі праз аэрапорт. Гэта ўжо абмежаванне. Па-другое, на пяць дзён. Таму калі мы спадзяемся, што пасля гэтай адмены візаў будзе вал турыстаў, яго не будзе. Трэба ўсё адно займацца піярам краіны. Што мы можам прапанаваць, што ў нас ёсць".

Навошта беларускім уладам увогуле адмяняць візы нават на пяць дзён?

І гэта, відаць, самае галоўнае пытанне. Лілія Кобзік мяркуе, што адказ на яго — у складанай эканамічнай сітуацыі, у якую трапіла краіна. Турызм — гэта тое, што можа прынесці хуткі прыбытак. Запоўніць пустыя гатэлі і павялічыць выручку нацыянальных паркаў. Разам з тым, дакумент, змест якога часткова агучыў намеснік міністра Партной, яшчэ не прыняты і невядома, як на яго адрэагуюць прадстаўнікі сілавых структур. Указ аб частковай адмене віз абмяркоўваюць ужо некалькі гадоў, і якім у выніку ён будзе, не ведае пакуль ніхто.

"Сілавікі, я думаю, будуць супрацьдзейнічаць гэтаму ўказу. З іншага боку, наверсе таксама ёсць розныя групы ўплыву. Нехта хоча адбіць укладанні, зробленыя ў інфраструктуру. І гэтыя ўкладанні рабіла, у тым ліку, і Упраўленне справамі кіраўніка краіны. Гэта самы магутны ўласнік беларускай інфраструктуры, ім трэба адбіваць укладанні", — гаворыць Кобзік.

Па ўсім відаць, што нават частковай адмены віз для замежнікаў чакаць яшчэ доўга. Знаўцы галіны гавораць, што дакумент гэты рыхтуецца да падпісання ўжо не першы год.