Палітвязня, які за кратамі перажыў інсульт, хочуць накіраваць у псіхлякарню

У псіхіятрычную лякарню хочуць накіраваць палітвязня, які ў зняволенні перанёс інфаркт, а потым інсульт, паведамляюць праваабаронцы.

Гаворка ідзе пра 48-гадовага фатографа Дзмітрыя Сончыка. Яго асудзілі на тры гады калоніі за каментары ў інтэрнэце. Да вызвалення яму засталося каля чатырох месяцаў.

Былыя вязні калоніі №2 кажуць, што цяпер Сончыка трымаюць у медчастцы. У палітвязня нібыта назіраюцца праблемы з псіхічным здароўем, таму мясцовыя лекары пад гэтай нагодай выдаюць яму нейкія лекі. Паведамляецца, што "лячэнне" пачалося яшчэ да таго, як палітвязня змясцілі ў медчастку.

Супрацоўнікі калоніі хочуць этапаваць Сончыка на абследванне ў гомельскую псіхіятрычную бальніцу, але ён адмаўляецца.

Таксама былыя вязні калоніі кажуць, што ў яго праблемы з карэспандэнцыяй.