Палітолаг: У траўні на вулічныя акцыі ў Мінску выйдзе не больш за 500 чалавек

Палітолаг: У траўні на вулічныя акцыі ў Мінску выйдзе не больш за 500 чалавек

Традыцыйнае шэсце “Чарнобыльскі шлях”, прысвечанае аварыі на Чарнобыльскай АЭС, не было масавым. Асабліва добра гэта бачна на фоне нядаўніх антыдармаедскіх акцый пратэстаў. Ці азначае гэта, што пратэстныя настроі ў беларускім грамадстве затухаюць? Што стала гэтаму прычынай і чаго чакаць ад магчымых акцый у траўні? На гэтыя ды іншыя пытанні ў жывым эфіры Еўрарадыё адказвае аналітык Беларускага інстытута стратэгічных даследаванняў Алена Арцёменка.

Цалкам размову з Аленай Арцёменка можна паслухаць тут:

Лепшыя цытаты з размовы:

Не круглая дата ― 31 ўгодкі аварыі на ЧАЭС, а надвор’е было неспрыяльным і паўплывала на колькасць людзей, якія вышлі на акцыю.

На антыдармаедскія акцыі масава выйшаў “перыферыйны” апазіцыйны актыў ― тыя, хто ў свой час адышоў ад палітычнага жыцця з-за рэпрэсій, але цяпер паверыў у агульны народны ўздым і лібералізацыю. Але рэпрэсіі на Дзень Волі зноў вярнулі гэтую “перыферыйную” апазіцыйную частку ў ранейшы стан ― ухілення ад удзелу ў вулічных акцыях.

Заўжды арганізатарамі вулічных акцый з’яўляюцца апазіцыйныя партыі, і таму на першы план выходзяць пытанні патрабаванні, якія іх найбольш хвалююць. Таму гэтым разам казалі пра Астравецкую АЭС і затрыманых па “справе Белага легіёна”.

Апазіцыйны актыў не зацікаўлены ў тым, каб працягваць ўдзельнічаць у акцыях. Тыя, каго тым ці іншым чынам закрануў дэкрэт №3, і хто выходзіў на акцыі ў сакавіку, больш выходзіць таксама не хочуць ― трымаюцца за тое, што маюць, і вераць у абяцанні ўладаў.

Не выключана, што акцыі ў траўні могуць быць больш масавыя за сёлетні “Чарнобыльскі шлях”, але не такімі масавымі, як антыдармаедскія акцыі ў сакавіку ― у Мінску колькасць удзельнікаў акцыі не перавысіць 500 чалавек.

Толькі пагаршэнне эканамічнага становішча людзей з-за канкрэтных рашэнняў улады, якія можна аспрэчыць пратэстнымі сродкамі, можа вывесці людзей на вуліцы. Гэта можа быць павышэнне цэн, рэзкае зніжэнне заробкаў ці нешта звязанае з валютай ― тое, што закране большасць людзей.

Апошнія навіны

Галоўнае

Выбар рэдакцыі