Па фактах катаванняў Вольгі Хіжынковай патрабуюць правесці праверку

Праваабаронцы падалі заяву ў пракуратуру горада Мінска з патрабаваннем правесці пракурорскую праверку па фактах катаванняў у дачыненні Вольгі Хыжынковай, а вінаватых прыцягнуць да адказнасці, паведамляе legin.by. Дакумент падпісалі шэсць праваабарончых арганізацый.

"Міс-Беларусь — 2008", былая прэс-сакратарка ФК "Дынама-Брэст" Вольга Хіжынкова была затрымана ў Мінску 8 лістапада. Ад таго часу яна знаходзіцца за кратамі. Прайшло ўжо некалькі судоў і тэрмін яе адміністрацыйнага арышту павялічваўся. Чакалася, што Вольга выйдзе на волю 11 снежня, але гэтага не адбылося.

Пасля прэзідэнцкіх выбараў Хіжынкова публічна выступіла супраць гвалту беларускіх сілавікоў і за новыя прэзідэнцкія выбары. У выніку яна засталася без працы ў Нацыянальнай школе прыгажосці.

У заяве выкладзена храналогія пераследу Вольгі Хіжынковай і катаванняў на Акрэсціна. Праваабаронцы перакананы, што адбываецца пераслед на падставе палітычных поглядаў. Яны патрабуюць ад пракуратуры наведаць затрыманую, высветліць сітуацыю, у тым ліку з аказаннем медыцынскай дапамогі Хіжынковай.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.