Новыя падрабязнасці пра зліў нафтапрадуктаў у вадаём каля Нацбібліятэкі

У сераду, 4 лютага, у вадаёме каля Нацыянальнай бібліятэкі выявілі масляныя плямы. На месца тэрмінова выехалі ратавальнікі. Як інфармуе прэс-служба МНС, нафтапрадукты траплялі ў вадаём з калектара. Забруджванне акваторыі канала Сляпянскай воднай сістэмы адбылося на плошчы каля 1 тысячы квадратных метраў.

Для ліквідацыі наступстваў зліву нафтапрадуктаў былі прыцягнутыя камунальныя службы, спецыялісты па гігіене і эпідэміялогіі, міліцыя. На канале ўстанавілі загароды, а ў ліўневай каналізацыі — заглушку.

Было высветлена, што ў вадаём патрапіў сінтэтычны эластамер: этылен-прапіленавы каўчук "Эпкар", які выкарыстоўваецца ў будаўніцтве ў якасці гідраізаляцыі. Перавышэнне ўтрымання нафтапрадуктаў у вадзе склала больш чым 23 разы. Расследаванне праводзіць Следчы камітэт. Цяпер шукаюць вінаватых у зліцці нафтапрадуктаў у калодзеж ліўневай каналізацыі.

Фота: МНС