Ночы ў Германіі: росквіт секс-турызму і таемнае знікненне гномаў — #ІхНоравы

12/07/2024 - 15:09

Замежныя навіны / @rubanau_collage

У Германіі — бум прастытуцыі. Ён звязаны з футбольнымі фанатамі, якія карыстаюцца секс-паслугамі за грошы падчас Еўра-2024.

Пакуль еўрапейцы культурна, хаця і не бясплатна адпачываюць і глядзяць футбол, у краіне квітнее злачыннасць. Нехта скраў калекцыю садовых гномаў, якую нямецкая сям’я збірала сорак гадоў. Інцыдэнт здарыўся ўночы, калі муж і жонка заснулі — якраз пасля футбольнай трансляцыі.

Больш трагічная навіна прыйшла з Румыніі. Там мядзведзь разадраў 19-гадовую турыстку. І падставіў усіх іншых мядзведзяў — цяпер улады хочуць адстрэльваць драпежнікаў.

Падрабязней пра гэта і не толькі чытайце ў традыцыйнай рубрыцы Еўрарадыё “Іх Норавы”.

Таямнічае знікненне садовых гномаў

Злодзеі скралі ў пажылой пары з Германіі калекцыю з 25 садовых гномаў. Рудольф і Герда збіралі яе сорак гадоў.

Паліцыя ацаніла шкоду ў 500 еўра, разумеючы, што для сям'і фігуркі мелі нашмат большую каштоўнасць.

— Першага гнома мы набылі для клумбы побач з домам у 1984-м. З часам калекцыя расла — сябры і сваякі дарылі нам новых гномаў на дні нараджэння і іншыя святы. У кожнага гнома быў свой характар, і мы іх вельмі любілі. Мы больш не будзем іх купляць, — падзялілася Герда.

Паліцыя мяркуе, што злодзеі звезлі скрадзеных гномаў на машыне, і шукае сведкаў.

Ночы ў Германіі: росквіт секс-турызму і таемнае знікненне гномаў — #ІхНоравы

Рудольф і Герда / Sascha Baumann / all4foto.de

Кветкі ў пустыні

Навукоўцы заўважылі белыя і фіялетавыя кветкі ў Атакаме. Гэтая чылійская пустыня лічыцца самай сухой у свеце.

У Паўднёвым паўшар'і зараз сярэдзіна зімы. Сёлета кветкі ўзышлі нашмат раней, чым гэта адбывалася да таго. Навукоўцы звязваюць гэта з кліматычным феноменам Эль-Ніньё, які прынёс раннія дажджы ў Ціхаакіянскі рэгіён. Што і актывізавала насенне і цыбуліны, якія спалі ў зямлі.

Прастытуцыя ў Германіі легалізаваная з 2002 года. У краіне працуюць дзясяткі публічных дамоў, а ў Берліне для аказання секс-паслуг адкрытыя спецыяльныя вулічныя будкі.

Па законе, любая ўстанова падобнага кшталту мусіць быць афіцыйна зарэгістраваная. Але пры гэтым тэсты супрацоўніц і супрацоўнікаў на ВІЧ і інфекцыі, якія перадаюцца палавым шляхам, для атрымання ліцэнзіі не з'яўляюцца абавязковымі.

Румынскія мядзведзі зусім азвярэлі

Прэм'ер-міністр Румыніі Марчэл Чалаку заклікаў дэпутатаў парламента сабрацца на пазачарговую сесію і абмеркаваць павелічэнне колькасці ліцэнзій на паляванне. Нагодай стала навіна пра 19-гадовую дзяўчыну, якую ў румынскіх Карпатах разадраў мядзведзь.

Трагедыя адбылася напярэдадні. Мядзведзь выйшаў на лясную сцежку і пабег за парай турыстаў. Ён дагнаў дзяўчыну, напаў на яе і пацягнуў у гушчар. Пазней яе цела знайшлі ў даліне ракі.

У Румыніі жыве каля васьмі тысяч бурых мядзведзяў. Гэта самая вялікая папуляцыя ў Еўропе. Драпежнікі ўсё часцей выходзяць да людзей у пошуках ежы. Колькасць нападаў дзікіх звяроў на турыстаў і мясцовых жыхароў увесь час расце.

— Відавочна, што ў нас занадта шмат мядзведзяў, занадта шмат інцыдэнтаў, у выніку якіх людзі атрымліваюць траўмы або гінуць, — кажа прэзідэнт Румыніі Клаўс Яханіс. — Я не паляўнічы і не спецыяліст у гэтай галіне, але лічу, што неабходна выпрацаваць заканадаўчае рашэнне, вядома, у адпаведнасці з еўрапейскімі правіламі. Але мы не можам абараняць жывёл за кошт жыццяў людзей.

Бурыя мядзведзі абароненыя спецыяльнай дырэктывай ЕС. Супраць іх адстрэлу выступаюць румынскія арганізацыі па абароне жывёл. Там кажуць, што звяры выходзяць да людзей праз нядбайную ўтылізацыю смецця і турыстаў, якія падкормліваюць мядзведзяў.