Навукоўцы выявілі, што гена, адказнага за гомасексуальнасць, не існуе
Аднаго гена, адказнага за гомасексуальнасць, не існуе. Да такой высновы прыйшлі навукоўцы, якія правялі генетычны аналіз звестак паўмільёна чалавек, перадае Бі-Бі-Сі.
Вынікі даследавання апублікаваныя ў вядомым часопісе Science. Навукоўцы вывучалі звесткі з Біябанка Вялікабрытаніі ды амерыканскай біятэхналагічнай кампаніі 23andMe.
Былі выяўленыя некаторыя генетычныя камбінацыі, звязаныя з аднаполымі адносінамі. Аднак генетычныя фактары толькі на чвэрць вызначалі гомасексуальныя паводзіны.
Даследчыкі з Гарвардскага ўніверсітэта і Масачусетскага тэхналагічнага інстытута прыйшлі да высновы: ад 8% да 25% гомасексуальных паводзінаў людзей вызначаюцца генетычнымі фактарамі, але не нейкім адным генам.
Пяць камбінацыяў генаў звязаныя з цягай да людзей свайго полу. Адна з іх звязаная з нюхам, другая — з палавымі гармонамі. Але разам яны вызначалі менш за 1% гомасексуальнасці.
"Фактычна немагчыма прадказаць сэксуальныя паводзіны чалавека паводле яго геному", — сцвярджае Бэн Ніл, прафесар аддзела аналітычнай і трансляцыйнай генетыкі ў Масачусетскай лякарні, які працаваў над даследаваннем.
З ім згодны Дэвід Керціс, ганаровы прафесар Інстытута генетыкі Каліфарнійскага універсітэта: "Гэтае даследаванне ясна паказвае, што не існуе такога паняцця, як "ген геяў".
Няўрадавая арганізацыя абароны правоў ЛГБТ GLAAD пракаментавала гэтае даследаванне наступным чынам: немагчыма дакладна сказаць, да якой ступені на паводзіны геяў і лесбіянак уплываюць прырода ці выхаванне.
