На суд над магілёўскім чыноўнікам-прыхільнікам Бабарыкі не пускаюць журналістаў

На працэс па справе намесніка кіраўніка магілёўскага гарвыканкама Уладзіміра Дударава перасталі пускаць журналістаў, паведамляе агенцтва БелаПАН.

Дудараў быў каардынатарам ініцыятыўнай групы Віктара Бабарыка падчас перадвыбарчай кампаніі.

Не змог патрапіць на працэс і журналіст агенцтва. У судзе яму сказалі, што гэты судовы працэс далей будзе праходзіць без гледачоў. Такое рашэнне прыняў старшыня суда "у сувязі з эпідэміялагічнай сітуацыяй".

Суд над Дударавым, якога праваабаронцы прызналі палітвязнем, пачаўся 19 красавіка. Яго абвінавачваюць у злоўжыванні службовымі паўнамоцтвамі і махлярстве. Першае злачынства Дударава заключалася, па версіі следства, у тым, што ён з парушэннямі павялічыў сваю кватэру. Будучы кіраўніком жыллёва-будаўнічага кааператыва, ён абраў сабе жыллё на апошнім паверсе, затым без згоды членаў кааператыва звярнуўся ў праектную арганізацыю, якая павялічыла вышыню тэхнічнага паверха. А потым выкупіў памяшканне на техэтаже і далучыў да кватэры.

Другі эпізод тычыцца дома яго бацькі. Паводле версіі следства, Дудараў — на той момант ён працаваў начальнікам аддзела будаўніцтва гарвыканкама — незаконна пабудаваў для бацькі дом у прыродаахоўнай зоне ракі Дубровенкі. А калі парушэнне выявілася, то ён перашкодзіў пачаць супраць бацькі адміністрацыйны працэс за самавольнае будаўніцтва.

Дудараў віны не прызнае і называе крымінальную справу супраць сябе непаразуменнем.Ён нагадаў у судзе, што да затрымання пракуратура праводзіла ў дачыненні да яго "мноства праверак", выносіліся пастановы аб адмове ва ўзбуджэнні крымінальных спраў.

Дудараў ў зняволенні ўжо больш года. Яго затрымалі 11 чэрвеня 2020 года, з тых часоў ён утрымліваецца ў магілёўскай турме № 4.