На фізіку-інфарматыку ў мінскі педагагічны 4 гады бяруць усіх без конкурсу

“Тэндэнцыі, каб прахадныя балы штогод раслі ці падалі няма, ёсць невялікія ваганні па спецыяльнасцях. У гэтым годзе па шэрагу спецыяльнасцяў балы ніжэй. На гэта паўплывала дэмаграфічная яма, а таксама адмена асобнага конкурсу у сельскіх і гарадскіх абітурыентаў”, - падсумоўваюць у прыёмнай камісіі БДУ.

На спецыяльнасці “кампутарная матэматыка і сістэмны аналіз” прахадны бал з 2012 года, калі адкрылася спецыяльнасць, вырас на 109 балаў, да 291 сёлета. А ў філолага англійскай мовы за чатыры гады падняўся на 39.

Педагагічны універсітэт імя Максіма Танка ўжо чатыры гады бярэ на фізіку-інфарматыку ўсіх: прахаднога бала тут не было ўжо ў 2010 годзе. На “беларускую мову і літаратуру” з англійскай замежнай сёлета ў гэты ўнівер бралі з 188 баламі з 400 магчымых. Чатыры гады таму, каб вучыцца на гэтай спецыяльансці трэба было мець 218 балаў.

У будучых выхавацеляў дзіцячых садкоў з БДПУ прахадны таксама упаў, за тры гады на 37 балаў. Драбнеюць педагогі… А новы рэктар гэтай вну Аляксанд Жук яшчэ ў ліпені падчас анлайн-канферэнцыі спадзяваўся, што балы будуць на 10-30 вышэй леташніх. Не апраўдалі надзей.

“Калі параўноўваць з мінулым годам, то прахадны ніжэйшы. А далей мы не аналізавалі пакуль, бо толькі ўступная кампанія скончылася”, - каротка адказваюць у прыёмнай камісіі МДУ імя Куляшова.

Па спецыяльнасцях “матэматыка-інфарматыка” і “фізіка-інфарматыка” тут сёлета праводзіўся данабор. Год таму на “інфарматыку” у гэтую вну бралі з 113 баламі, а тры гады таму на інфарматыка паступалі маючы ўсяго 103 балы па трох тэстах і атэстаце.

У Беларускім нацыянальным тэхнічным універсітэце на “тэхналогію машынабудаўніцтва” сёлета бралі з 136 баламі. Тры гады таму прахадны быў вышэй: 167 балаў.

А ў будучых кіраўнікоў на “эканоміцы і кіраванні на прадпрыемтсве” прахадны за тры гады наадварот павысіўся з 228 да 285 сёлета.

Фота: edu-vienna.com