На фэсце ў Нямеччыне музыкі з усяго свету развучылі беларускія песні

Да таго ж немцы выдалі песеннік пад назвай “Купалінка”. На яго прэзентацыі пабывалі вядомыя беларускія музыкі (ФОТАРЭПАРТАЖ) Ва ўсходненямецкім мястэчку Люцэнзомэрн ужо дзевятнаццаты раз адгудзеў міжнародны фестываль ворк-шопаў “Singentreffen”. Мараканцы, немцы, румыны, балгары, палякі, чылійцы, украінцы, французы і беларусы чарговы раз абмяняліся вобразамі сваіх культур, авалодалі досведам ігры, гульні, спеваў, танцаў. Сярод беларусаў былі заўважаныя прадстаўнікі гуртоў “Фляус і Кляйн”, “IQ48”, “Яр”, “Скимен”. Нашы музыкі сыгралі канцэрт, удзельнічалі ў “джэмах” і навучылі сваім і народным песням усіх ахвотных.

Апроч таго, арганізатары фэсту — BDP (Bund Deutscher Pfadfinderinnen) у рамках праекту “Rhythmus Global” выдалі і прэзентавалі на фэсце зборнік песень пад назвай “Купалінка”, куды ўвайшлі добрыя песні ўсходняй і заходняй Еўропы, у тым ліку і 10 беларускіх. Да песенніка дадаецца CD з гэтымі песнямі, запісанымі падчас мінулагодніх фэстаў.