МЗС пра новыя санкцыі ЕС: нахабны валюнтарызм еўрабюракратыі павінен спыніцца

18/12/2020 - 14:30

У МЗС Беларусі трэці пакет санкцыяў ЕС, прыняты 17 лістапада, называюць "зусім дурным, недальнабачным і ва ўсіх адносінах недасканалым рашэннем". Такую характарыстыку даў яму прэс-сакратар МЗС Анатоль Глаз.

Па яго словах, такія крокі ніколі не дасягалі сваёй мэты раней і не дасягнуць яе і цяпер: "Звычайная спроба вонкавага ўмяшання ва ўнутраныя справы незалежнай дзяржавы, аб падтрымцы суверэнітэту якой так любяць размаўляць нашы еўрапейскія партнёры. Таксама ўжо няма сумневаў, што на справе гэтыя крокі накіраваныя і супраць інтарэсаў простых беларусаў".

Глаз заявіў, што афіцыйны Мінск падрыхтаваў ужо меры ў адказ на еўрапейскія санкцыі: "Нашы меры ў адказ ужо падрыхтаваныя. Некаторыя з іх даволі адчувальныя. Хай асобныя еўрапейскія апаненты потым не дзівяцца і не спрабуюць перакладаць віну".

Як распавядала Еўрарадыё, пад новы пакет санцыяў ЕС трапілі сем прадпрыемстваў ("Белтэхэкспарт", "Дана Холдынгз", Кіраўніцтва справамі прэзідэнта, "Сінезіс", "Агат", 140-ы рамонтны завод, МЗКЦ) і 29 чалавек.

Глаз мяркуе, што гэтыя санкцыі абсурдныя і "проста дыскрэдытуюць здаровы сэнс".

"Ну, у чым правініліся перад Еўрасаюзам тысячы рабочых прадпрыемстваў, якія трапілі пад санкцыі? Разлічваем, што не толькі беларускія прафсаюзы, але і Міжнародная федэрацыя прафсаюзаў, а таксама іншыя профільныя арганізацыі звернуць на гэта пільную ўвагу", — заявіў ён.

Уключэнне ў спіс кіраўніка Мінаблвыканкама, а раней міністра аховы здароўя Уладзіміра Караніка дыпламат іранічна патлумачыў уплывам фантастыкі: "Гэта пабочнае ўплыў ад фантастыкі, калі ў любым дзеянні трэба прызначыць "доктара Зло"?"

Між тым, як адзначалі назіральнікі, менавіта пасля прызначэння Караніка ў Гродзенскую вобласць там узмацніліся рэпрэсіі супраць удзельнікаў мірных пратэстаў.

Згадаў прэс-сакратар і IT-кампанію "Сінезіс": "Чым не дагадзіў Еўрасаюзу беларускі IT-сектар таксама незразумела. Але зразумела іншае: ініцыятары падобных рашэнняў павінны панесці адказнасць за канкрэтную нанесеную шкоду, у тым ліку эканамічную. Гэты нахабны валюнтарызм еўрабюракратыі калісьці павінен спыніцца".

Традыцыйна МЗС заявіў, што ўрэгуляваць рознагалоссі можна толькі праз дыялог: "Мы да такога дыялогу заўсёды былі і застаемся гатовымі".

Гатовасці да дыялогу з уласнымі грамадзянамі, якія пратэстуюць супраць фальсіфікацыі на выбарах і гвалту сілавікоў на вуліцах, беларускія ўлады не выяўляюць.