Мінчук Дзмітрый Белікаў атрымаў тры гады "хіміі" за 10 хвілін на вулічнай акцыі
Мінчук Дзмітрый Белікаў атрымаў тры гады "хіміі" (абмежавання волі з накіраваннем у папраўчую ўстанову адкрытага тыпу) за 10 хвілін на вулічнай акцыі 20 верасня мінулага года ў Мінску. Як паведамляюць праваабаронцы, яго прызналі вінаватым у "арганізацыі і падрыхтоўцы дзеянняў, што груба парушаюць грамадскі парадак". Крымінальную справу разглядаў суд Заводскага раёна сталіцы. Белікаў знаходзіцца пад падпіскай аб нявыездзе.
Дзмітрыя Белікава прызналі вінаватым у тым, што 20 верасня 2020-га ён далучыўся да мітынгу ў складзе групы з 800 чалавек, прыняў актыўны ўдзел у ім, меў з сабой сцяг. Пры гэтым была парушана праца транспарту. У судзе паказалі відэазапіс, на якім пратэстовец пазнаў сябе. Белікаў прызнаў сябе вінаватым.
Адвакат падкрэсліваў, што абвінавачаны далучыўся да мітынга неўсвядомлена, калі выходзіў з крамы, а агульны час яго ўдзелу ў мерапрыемстве не перавысіў 10 хвілін. Таксама адвакат нагадаў, што няма доказаў спынення транспарту ў той час і ў тым месцы, дзе быў Белікаў.
