Медыкі: памерлы віцяблянін заразіўся каранавірусам ад замежніка падчас рэпетыцыі
Заслужаны артыст Беларусі Віктар Дашкевіч кантактаваў з замежнікам — патэнцыйным носьбітам віруса. Пра гэта ў эфіры тэлеканала "Беларусь 1" заявіла намесніца начальніка галоўнага ўпраўлення па ахове здароўя Віцебскага аблвыканкама Людміла Кавалёва.
"Інфікаванне адбылося падчас рэпетыцыі", — паведаміла медыцынская чыноўніца.
Віктар Дашкевіч стаў першай афіцыйнай ахвярай каранавіруса ў Беларусі. Яго шпіталізавалі 24 сакавіка з двухбаковай пнеўманіяй. Потым тэст на каранавірус даў станоўчы вынік.
Па словах Кавалёвай, у мужчыны было мноства спадарожных захворванняў: хранічная абструктыўная хвароба лёгкіх, эмфізема, пнеўмасклероз, дыхальная недастатковасць 2-й ступені, хранічнае лёгачнае сэрца, хранічная недастатковасць кровазвароту, што ўскладніла цячэнне асноўнага захворвання і прывяло да дыхальнай недастатковасці.
Кавалёва дадала, што ў чальцоў сям'і памерлага віцябляніна каранавірусная інфекцыя не пацверджаная.
У інтэрв'ю Еўрарадыё дачка Віктара Дашкевіча Ганна выказала меркаванне, што бацька мог заразіцца каранавірусам у лякарні, куды трапіў з пнеўманіяй.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
