Марак, палкоўнік і прадпрымальнік змагаюцца за пасаду прэзідэнта Польшчы
Агулам заяўкі на рэгістрацыю падалі 23 выбарчыя камітэты. Сярод іх і найбольш папулярныя кандыдаты ў прэзідэнты — спікер Сейма Браніслаў Камароўскі і брат-блізн
Ажно 23 кандыдаты прэтэндуюць на крэсла прэзідэнта Польшчы. Іх выбарчыя камітэты маюць час да 6 траўня, каб сабраць 100 тысяч подпісаў падтрымкі. Толькі тады кандыдатаў афіцыйна зарэгіструюць. Аднак эксперты лічаць, што не ўсе выбарчыя камітэты маюць шанец прайсці гэты этап.
Вялікая колькасць выбарчых камітэтаў здзіўляе і польскіх выбарцаў. Такой актыўнасці кандыдатаў не прадбачылі нават сацыёлагі, паведаміў Польскаму радыё дырэктар Інстытуту сацыялогіі і філасофіі Польскай акадэміі навук Генрык Даманьскі.
Генрык Даманьскі: “Некалькі тыдняў таму былі меркаванні, што жалобны настрой стане прычынай таго, што будзе толькі некалькі галоўных камітэтаў, ну можа 4-5-6, ну можа 10. Але не 23! Гэта вельмі дзіўна!”
Цікава таксама і тое, што, акрамя вядомых палітыкаў, у прэзідэнцкай гонцы хочуць удзельнічаць даволі “экзатычныя” кандыдаты. Напрыклад, нацыяналіст палкоўнік Людвік Васяк. У інтэрв’ю польскім СМІ ён паведаміў, што хоча цалкам змяніць Польшчу.
Людвік Васяк: “Гэтая трагедыя пад Смаленскам у пэўным сэнсе ўсіх нас змяніла. І кожны мае сумненні, ці тое, што здарылася, гэта не своеасаблівы знак. Мы думаем, ці трэба рухацца далей у тым самым напрамку, што апошнія 20 гадоў. Можа гэта сімвал, што трэба нешта змяняць?Таму што наша краіна, нашы людзі не могуць даць рады з гэтым”.
На думку Людвіка Васяка, новая Польшча павінна быць краінай для палякаў, і кіраваць імі павінны таксама палякі. Неабходнасць зменаў, хоць і менш радыкальных, падкрэсліваюць і іншыя “нетыповыя” кандыдаты на прэзідэнта — 67-гадовы марскі капітан Здзіслаў Падканьскі, а таксама 55-гадовы прадпрымальнік Раман Склеповіч, які змагаецца з банкамі.
Не менш спрэчак у грамадстве выклікала і кандыдатура брата-блізнюка загінулага прэзідэнта — Яраслава Качыньскага. Тым не менш, ён вырашыў выстащляць кандыдатуру, паведаміла журналістам 26 красавіка шэф выбарчага штаба Яраслава Качыньскага Ёанна Клюзік-Расткоўска.
Ёанна Клюзік-Расткоўска: “ Давайце паспрабуем на хвілінку забыць пра тое, што трагічна загінулы Лех Качыньскі і Яраслаў браты-блізнюкі. Калі б не гэтая драматычная акалічнасць, было б цалкам зразумела і відавочна, што кандыдатам партыі “Права і справядлівасць” будзе яе кіраўнік Яраслаў Качыньскі, чалавек з вялікім палітычным досведам, былы прэм’ер-міністр і найважнейшая асоба ў партыі”.
Нягледзячы на даволі вялікую папулярнасць у грамадстве, Яраслаў Качыньскі пакуль моцна адстае ад свайго галоўнага саперніка — спікера Сейма Браніслава Камароўскага. Паводле газеты “Rzeczpospolita” Браніслава Камароўскага падтрымліваюць 47% апытаных, а Яраслава Качыньскага толькі 26%. Некалькі адсоткаў выбарцаў збіраецца прагаласаваць за Анджэя Аляхоўскага, Гжэгажа Наперальскага і Вальдэмара Паўляка. Іншыя кандыдаты могуць разлічваць на менш за 1-2% галасоў.
Адзіная надзея выбарчых камітэтаў — эфектыўная прэзідэнцкая кампанія, на якую прыйдзецца патраціць мільёны злотых. Падчас апошніх выбараў прэзідэнта ў 2005 годзе галоўныя кандыдаты — Дональд Туск і Лех Качыньскі — выдаткавалі прыкладна па 14 мільёнаў злотых, то бок каля 4,8 мільёнаў долараў кожны. Чакаецца, што сёлетняя кампанія будзе яшчэ даражэйшая, таму што часу да выбараў засталося зусім не шмат.
