Мабільны дадатак прыняў Пуціна за аўчарку, а Кім Чэн Ына — за пекінэса (фота)
![Мабільны дадатак прыняў Пуціна за аўчарку, а Кім Чэн Ына — за пекінэса (фота)](/sites/default/files/styles/gallery_main/public/2023-08/sabaki_9.jpg.webp?itok=6skwMc-6)
Кампанія Microsoft выпусціла мабільны дадатак Fetch!, які ўмее распазнаваць пароду сфатаграфаванага сабакі. Гэты сервіс мае і вэб-версію — можна загрузіць фотаздымак і высветліць, што за сабака на ім выяўленая.
Рэдакцыя meduza.io вырашыла пажартаваць і загрузіла ў дадатак фотаздымкі сусветных лідараў. Камп'ютар прааналізаваў выявы — і вырашыў, што расійскі прэзідэнт Уладзімір Пуцін падобны да нямецкай аўчаркі, паўночнакарэйскі лідар Кім Чэн Ын нагадвае пекінэса, а нямецкі канцлер Ангела Меркель выглядае як памеранскі шпіц.
Апроч гэтага, праграма выдала характарыстыкі парод сабак. Многія з іх супадаюць са стылем кіравання вядомых палітыкаў. Напрыклад, пра пекінэса сказана, што ў яго “імперскае мысленне”, а пра бурбуля (парода, якая дасталася прэзідэнту Турцыі Рэджэпу Таіпу Эрдагану) — што ён “камунікабельны і пакорны толькі пасля трэніроўкі”.