Лукашэнка пакатаўся па МКАД на аўтобусе як пасажыр
president.gov.by
Аляксандр Лукашэнка 24 траўня з'ездзіў на Мінскую кальцавую аўтадарогу, каб паглядзець, як праходзіць добраўпарадкаванне тэрыторыі ўздоўж МКАД. Кіраўніку дзяржавы заадно паказалі аўтобусы МАЗ і "Нёман", якія будуць выкарыстоўвацца падчас II Еўрапейскіх гульняў. Лукашэнка пракаціўся з чыноўнікамі на аўтобусе па МКАД у якасці пасажыра і высока ацаніў падрыхтоўку да свайго візіту.
"Павінен сказаць, што за суткі вы больш зрабілі, чым за год. Гэта сведчыць аб тым, што трэба прыязджаць і глядзець, і не толькі мне. За суткі і абкасілі, і выраўнялі, і паліваюць. Так трэба і працаваць", — сказаў кіраўнік Беларусі.
Падчас паездкі Лукашэнка запатрабаваў больш прадумана падыходзіць да азелянення тэрыторый уздоўж МКАД: высаджваць на развязках і адхонах не толькі дрэвы, але і хмызнякі, забудоўваць пустыя тэрыторыі крамамі, запраўкамі і інш.
Кіраўнік дзяржавы даў чыноўнікам год, каб вызначыцца з планамі забудовы тэрыторый уздоўж МКАД. "Рабіце самі. Калі ўжо ўзгадніць трэба, то адным лістом узгаднілі і ўсё. Каб вы самі маглі прыводзіць гэта ў парадак так, як мы з вамі дамовіліся. Але і лічыце грошы", — падкрэсліў Лукашэнка.
