Летась у Беларусі ліквідавалі больш за 330 некамерцыйных арганізацый — Lawtrend
![Суд / Суд / Еўрарадыё](/sites/default/files/styles/gallery_main/public/2023-08/sud-0708.jpg.webp?itok=K5I6Aka-)
Суд, ілюстрацыйнае фота
За 2023 год у Беларусі ліквідавалі не менш за 336 некамерцыйных арганізацый (НКА) — аб’яднанняў, прафсаюзаў, фондаў, недзяржаўных установаў і асацыяцый. Такая лічба называецца ў новай справаздачы праваабарончай арганізацыі Lawtrend.
Агулам за час ад прэзідэнцкіх выбараў 2020 года і да канца 2023-га ў Беларусі ліквідавалі мінімум 1509 некамерцыйных арганізацый.
На канец снежня 2023-га не менш за 960 НКА былі ў працэсе прымусовай ліквідацыі. А яшчэ 549 арганізацый прынялі рашэнне пра самастойную ліквідацыю. Праваабаронцы падкрэсліваюць, што рашэнне пра самаліквідацыю прымаецца перш за ўсё з прычыны ціску на сяброў арганізацыі, неспрыяльнага прававога асяроддзя, агульнай грамадска-палітычнай сытуацыі ў краіне.
У справаздачы Lawtrend згадваецца, што масавая ліквідацыя істотна закранула аб’яднанні нацыянальных меншасцяў. З 11 зарэгістраваных у Беларусі нацыянальных, культурна-асветніцкіх некамерцыйных арганізацый палякаў на сённяшні дзень засталіся толькі дзве — ГА "Польская община" і праўладны "Саюз палякаў на Беларусі".
За 2021–2023 гады былі прымусова ліквідаваныя чатыры нацыянальныя аб'яднанні літоўцаў, яшчэ столькі ж самастойна вырашылі ліквідавацца. Ліквідаваныя таксама МГА армян "Урарту", Брэсцкае абласное габрэйскае аб’яднанне "Алія", Полацкі габрэйскі культурны цэнтр, "Габрэйская адукацыйная праграма", Беларускае таварыства немцаў "Нямецкі дом".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.