Легальныя стэйкі “з кроўю” рэстараны пачнуць гатаваць на пачатку сакавіка

6 сакавіка набываюць моц новыя “Санітарна-эпідэміялагічныя патрабаванні для аб'ектаў грамадскага харчавання”. Адпаведная пастанова была падпісаная міністрам аховы здароўя яшчэ 10 лютага. Таму, калі 14 лютага Аляксандр Лукашэнка выказаў здзіўленне існуючымі санітарнымі нормамі, ён ведаў, што гэтыя правілы ўжо змяніліся. Тым не менш выказаўся пра тое, чаму мяса, яйкі і малако даводзіцца захоўваць у розных лядоўнях.

"У пераважнай большасці людзей халадзільнік адзін. І нічога, ніхто не атруціўся. Малако сёння запакаванае як след. Яно ніякага ўплыву не аказвае", ― кажа кіраўнік краіны. ― Не трэба нічога ўскладняць. Можа быць, хтосьці не ведае, але, каб прыгатаваць простыя дранікі, рэстаранам трэба мець як мінімум некалькі памяшканняў. Таму яны сёння вымушаныя гатаваць нацыянальную страву з замарожаных паўфабрыкатаў замежнай вытворчасці".

З гэтай нагоды Еўрарадыё пагутарыла са старшынёй гільдыі кухараў Аляксандрам Чыкілеўскім, які прааналізаваў старыя і новыя нормы. Ці давядзецца і далей мець 27 памяшканняў на траіх супрацоўнікаў, ці можна будзе гатаваць стэйк і тар-тар і ці паўплывае гэта на кошты страваў, вы можаце пачуць тут:

А вось некаторыя думкі Аляксандра Чыкілеўскага пра новыя санітарныя нормы:

Фота: Oede.by

На сам працэс прыгатавання новыя нормы не паўплываюць. Адзінае, што разглядаецца магчымасць ужывання новых тэхналогій на кухні: шокавая замарозка, гатаванне пры маленькіх тэмпературах і вакуўмацыя.

Яшчэ з часоў Савецкага саюза пад кожны працэс трэба было мець асобнае памяшканне, якіх у выніку атрымліваецца вельмі шмат. У новым праекце на гэты конт зменаў не заўважна.

На самой справе, шмат што ў новых нормах аблягчае працу кухараў. Напрыклад, тэма маркіроўкі гастранамічных ёмістасцяў, якая даўно ўжо аджыла сваё.

Па старых правілах, гатовасць мяса правяралася пратыканнем і выдзяленнем соку без колеру, што фактычна забараняла стэйкі. Гэтую норму прыбіраюць.

Калі мы карыстаемся вакуумам і нізкімі тэмпературамі, то не думаю, што ёсць сэнс захоўваць прадукты ў асобных камерах.

Паўфабрыкаты, якія мусяць набываць невялікія рэстараны, каштуюць не так ужо і танна, таму, натуральна, гэта можа ўплываць на фінальны кошт стравы.

Калі прыбраць усе санітарныя нормы, то кошты, верагодна, стануць меншымі. Але нязначна.

У нас нельга самім нарыхтаваць кампотаў, джэмаў, кансерваў на ўвесь год, набываючы прадукты для гэтага ў сезон, калі яны найбольш танныя.

У параўнанні з той жа Германіяй нашы нормы вельмі строгія і, на мой погляд, часам нават перашкаджаюць працаваць.

На рынку я магу ўзяць самае свежае мяса, але гэта забаронена. А з нашых мясакамбінатаў часта прыходзіць мяса замарожанае. З замарожанага ўжо не прыгатуеш тое і так, як з ахалоджанага.

Па-за эфірам старшыня гільдыі кухараў Беларусі Аляксандр Чыкілеўскі распавёў “замежныя гісторыі”, якія, на думку, шэф-повара, моцна б здзівілі нашу санстанцыю.