Кіраўнік МУС: Рэформа беларускай міліцыі практычна завершаная
Яна дазволіць зэканоміць сродкі, якія пойдуць на матэрыяльна-тэхнічную базу міліцыі і на заробкі супрацоўнікам.
Кіраўнік Беларусі Аляксандр Лукашэнка 17 ліпеня прыняў са справаздачай міністра ўнутраных справаў Ігара Шуневіча. Сустрэча адбылася па просьбе кіраўніка МУС.
Як паведамляе TUT.by са спасылкай на прэс-службу беларускага лідара, Шуневіч далажыў, што рэформа МУС “практычна завершаная”. Была зробленая кадравая аптымізацыя і ліквідаваная частка рудыментарных падраздзяленняў.
Вызваленыя сродкі скіраваныя на развіццё міністэрства, павышэнне грашовых выплатаў супрацоўнікам, паляпшэнне матэрыяльна-тэхнічнай базы. Апроч таго, быў цалкам перагледжаны ўвесь спектр задачаў, якія стаяць перад МУС, а неўласцівыя міністэрству функцыі зліквідаваныя.
Аляксандр Лукашэнка даручыў працягнуць аптымізацыю працы МУС, у тым ліку кадравую і функцыянальную. У бліжэйшы час ён атрымае канкрэтныя прапановы на гэты конт.
Апроч таго, міністр унутраных справаў далажыў пра некаторыя аператыўныя матэрыялы, якія знаходзяцца ў распрацоўцы МУС, у тым ліку пра барацьбу з арганізаванай злачыннасцю і карупцыяй.