Хто лічыцца дармаедам, а хто — не (дапоўнена)

2 красавіка Аляксандр Лукашэнка падпісаў дэкрэт №3 "Аб папярэджанні сацыяльнага ўтрыманства" ("дэкрэт аб дармаедах"). Дакумент закліканы стымуляваць удзел працаздольных беларусаў у працоўнай дзейнасці, у фінансаванні дзяржаўных выдаткаў.

Калі пачынае дзейнічаць дэкрэт

Адлік працоўнай ці беспрацоўнай дзейнасці згодна з Дэкрэтам пачынаецца з 1 студзеня 2015 года. Гэта азначае, што калі з новага года вы нідзе не працавалі, то засталося ўсяго 3 месяцы, каб уладкавацца. Падатковы збор з дармаедаў — 20 базавых велічынь (на сёння 3 мільёны 600 тысяч рублёў).

Хто лічыцца дармаедам і павінен выплаціць падатак

Усе грамадзяне Беларусі і асобы з відам на жыхарства ў нашай краіне працаздольнага ўзросту (18-55 гадоў для жанчын, 18-60 для мужчын), хто не працаваў паўгода і 1 дзень — дармаеды. У іх лік трапляюць:

- Беспрацоўныя, якія маюць неафіцыйны даход і не плацяць падатак;

- Хатнія гаспадыні (калі яны не мнагадзетныя маці, або не выхоўваюць дзіця да 7 гадоў або дзіця-інваліда да 18 гадоў);

- Студэнты-завочнікі, калі яны нідзе не працуюць;

- Іпэшнікі і рамеснікі, якія не вядуць ніякую дзейнасць і не плацяць падатак. Або працавалі, але заплацілі падатак меншы за 20 базавых велічыняў. У гэтым выпадку яны павінны будуць даплаціць, каб выніковая сума складала 20 базавых.

- Дачнікі, якія нідзе не працуюць, а жывуць з ураджаю.

Сем легальных спосабаў пазбегнуць падатку за дармаедства

Хто не лічыцца дармаедам і не павінен плаціць падатак?

Усе, хто афіцыйна працаваў цягам года больш за 183 дні, займаецца прадпрымальніцкай дзейнасцю і плаціць падаткі больш чым 20 базавых за год. А таксама:

- Падлеткі, якім яшчэ няма 18 гадоў. Калі 18 стукнула сёлета, то можаце не працаваць да канца года.

- Пенсіянеры. У тым ліку тыя, хто дасягнуў пенсійнага ўзросту ў гэтым годзе.

- Студэнты дзённай формы навучання.

- Беспрацоўныя, якія стаяць на ўліку ў службе занятасці (але ў такім статусе можна быць не больш за 3 месяцы).

- Уладальнікі аграсядзібаў. Той, хто афіцыйна займаецца аграэкатурызмам (гэта павінен пацвердзіць мясцовы выканкам) і плаціць падаткі — не дармаед.

- Жыхары вёскі і іншых населеных пунктаў, якія маюць надзел і займаюцца сельскай гаспадаркай. Гэты факт павінен пацвердзіць сельсавет.

- Жанчыны або мужчыны якія расцяць дзяцей да 7 гадоў ці дзяцей-інвалідаў да 18 гадоў.

- Фрылансеры і творчыя асобы, якія зарабілі за год мінімум 70 базавых (12,6 мільёна). Пры гэтым не важна, колькі дзён яны працавалі. Калі такую суму яны зарабілі хоць за 1 гадзіну — дармаедамі яны ўжо не лічацца.

- Мастакі, музыканты, пісьменнікі, скульптары, дызайнеры і інш. Але яны абавязкова павінны быць сябрамі адпаведных творчых саюзаў.

- Манахі, святары і члены манастырскай грамады

- Уладальнікі кватэр, якія афіцыйна здаюць сваё жыллё і плацяць з гэтага падатак.

- Адвакаты і натарыюсы

- Хворыя, непрацаздольныя, якія знаходзяцца на бальнічным

- Асуджаныя, якія адбываюць пакаранне ў турме, ЛПП ці калоніі больш за 183 дні.

- Інваліды, незалежна ад групы або тыя, з каго сёлета інваліднасць знялі.

- Недзеяздольныя.

- Людзі, якія атрымліваюць выплаты па страце кармільца.

- Вайскоўцы а таксама рэзервісты і ваеннаабавязаныя падчас збораў

- Падарожнікі і гастарбайтэры з Беларусі, якія знаходзіліся ў краіне сумарна менш 183 каляндарныя дні, — не дармаеды.

- Сезонныя рабочыя, хто адпрацаваў на працягу поўнага сезона на сезонных працах (спіс такіх прац вызначаны Саветам міністраў). Напрыклад, сельскагаспадарчыя работы ў перыяд збору ўраджаю.

Якія перыяды дзейнасці сумуюцца і ўплываюць на тое, каб вас не прылічылі да дармаедаў?

Калі вы 1 месяц выхоўвалі дзіця ва ўзросце да 7 гадоў, 1 месяц працавалі па дамове, 1 месяц былі на вайсковых зборах, 1 месяц вялі адвакацкую дзейнасць, 1 месяц адсядзелі ў турме, пасля гэтага 1 месяц былі часова недзеяздольныя — і ў суме гэта больш за 183 дні, то дармаедам вы ўжо не лічыцеся.

Хто будзе лавіць дармаедаў

Паводле Дэкрэта, шукаць, адсочваць і збіраць грошы з дармаедаў будуць падатковыя органы. Падатковая будзе правяраць расходы і даходы грамадзян і шукаць лайдакоў. Дарэчы, калі ў падатковай прызнацца, што ты дармаед да 1 ліпеня 2016 года, зробяць зніжку на падатак у 10%.

Што рабіць, калі вам прыйшло паведамленне аб тым, што вы дармаед

У вас ёсць 30 дзён, каб даказаць, што вы не дармаед. Потым падатковая яшчэ 30 дзён будзе правяраць вашы дакументы. На гэты перыяд падатковая прыпыняе спагнанне збору. А далей прымае рашэнне ўзяць з вас збор, паменшыць яго ці не браць нічога наогул.

Калі трэба плаціць падатак

Да 15 лістапада наступнага года (напрыклад, за 2015 года трэба будзе заплаціць падатак да 15 лістапада 2016-га)

Як могуць пакараць дармаеда

За нявыплату збору ці няпоўную выплату будуць штрафаваць — ад 2 да 4 базавых велічынь (ад 360 тысяч да 720 тысяч рублёў). Прадугледжаны і адміністратыўны арышт. У гэтым выпадку вас абавязкова накіруюць на грамадска-карысныя працы. І плаціць падатак вам не давядзецца.

Аляксандр Лукашэнка падпісаў "дэкрэт аб дармаедах"

Стала вядома, каму перададуць спісы беларускіх "дармаедаў"

Лукашэнка: 400 тысяч мусяць быць уцягнутыя ў працу імем рэвалюцыі

Фота: grodno.in