Вы тут

Харэограф, выкладчыца, дэпутат: што вядома пра новых рэктараў

Наталля Лапцева, Аляксандр Бахановіч і Наталля Карчэўская

Аляксандр Лукашенка сення прызначыў рэктараў у тры беларускія ўніверсітэты: мінскі лінгвістычны, універсітэт культуры ды брэсцкі тэхнічны. Адбылося гэта праз 10 дзён пасля рэзкай крытыкі ў бок кіраўнікоў ВНУ: маўляў, пры іх студэнты пачалі “нядбайна ставіцца да вышэйшай адукацыі”. 

Еўрарадыё сабрала асноўныя факты пра новых рэктараў.

МДЛУ: Наталля Лапцева

Кандыдат філалагічных навук Наталля Лапцева змяніла на пасадзе рэктара Наталлю Баранаву, якая кіравала МДЛУ 25 гадоў. Да прызначэння Лапцева таксама працавала ў лінгвістычным універсітэце — дэканам факультэта нямецкай мовы. Яна не толькі адміністравала факультэт, але і выкладала на ім. Водгукі ад студэнтаў пераважна станоўчыя.

Пасля адлічэння з МДЛУ студэнткі Лізаветы Пракопчык, якая ініцыявала рух “Ха-ха, я тут памру” падчас веснавой пандэміі каранавіруса, Лапцева сказала “Радыё Свабода”, што рэч была толькі ў нездавальняючых выніках навучальнага працэсу.

— Тое, што яна ў гэтым месяцы не была атэставаная па ўсіх дысцыплінах першай замежнай мовы, гэта для нас сур’ёзнае адхіленне, бо з наступнага года нашыя студэнты ідуць на практыку ў школу. І мы б хацелі, каб яны там годна выкладалі нямецкую мову.

БДУКМ: Наталля Карчэўская

Ужо былая першая намесніца міністра культуры Карчэўская выконвала абавязкі рэктара БДУКМ з канца жніўня. Цяпер Лукашенка зацвердзіў яе на гэтай пасадзе.

Намеснікам міністра культуры яна стала ў 2018-м: тады Карчэўская змяніла на пасадзе адыёзную Ірыну Дрыгу. Але ж “карані” яе заўсёды былі ў БДУКМ: яна скончыла харэаграфічны факультэт універсітэта, пасля абараніла кандыдацкую. 

Бацька Карчэўскай — адзін з заснавальнікаў беларускага біятлона Уладзімір Карчэўскі. Наталля Карчэўская катаецца на ровары і электрасамакаце, любіць лыжы, а таксама шмат падарожнічае. Цікавіцца яна і модай: напрыклад, носіць сумкі Louis Vuitton.

У інтерв’ю “Минск-Новостям” Карчэўская кажа, што на працы ва ўніверсітэце ніколі не павышае голас:

— Па-першае, гэта непрафесійна, па-другое — прыкмета бяссілля. Праўда, і жалезнай лэдзі сябе не лічу: магу паплакаць сабе ў кутку, калі ніхто не бачыць. Яркія ж эмоцыі зберагаю для лекцый.

БрДТУ: Аляксандр Бахановіч

Дэпутат Мінгарсавета Аляксандр Бахановіч перайшоў на пасаду рэктара БрДТУ з БНТУ. Там апошнія гады ён быў прарэктарам па навучальнай частцы, а да таго — дэканам аўтатрактарнага факультэта.

Бахановіч скончыў Магілёўскі машынабудаўнічы інстытут (цяпер — Беларуска-Расійскі ўніверсітэт). Мае ступень докатара тэхнічных навук. Яшчэ падчас працы дэканам АТФ атрымаў падзяку ад Аляксандра Лукашэнкі.

— Я бясконца шаную і ўдзячны кіраўніцтву краіны за тое, што змог рэалізаваць сябе на Радзіме, — кажа Бахановіч у адным з інтерв'ю для сайта “Белай Русі”. У тым жа інтервʼю ён прызнаецца: “Разам — мы сіла! А беларускі народ, наша краіна сваёй шматвяковай гісторыяй заслужылі права жыць годна і прыгожа”.

Бахановіч вядзе старонку ва “УКантакце”, дзе часта публікуе спасылкі на навіны дзяржСМІ. Час ад часу — з уласнымі каментарамі. Напрыклад, да допісу пра выступ Лукашенкі на мітынгу ён дадаў: “Сапраўдны лідар нашай нацыі! Брава!”

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.