ЕС рашуча асудзіў зверствы расійскіх войскаў у Бучы
Еўрапейскі Саюз "самым рашучым чынам" асудзіў "паведамленні аб зверствах, учыненых расійскімі ўзброенымі сіламі ў шэрагу ўкраінскіх гарадоў". Сумесная заява з'явілася 4 красавіка на сайце Савета Еўропы.
У дакуменце падкрэсліваецца, што масавыя забойствы ў горадзе Буча ды іншых украінскіх гарадах будуць унесеныя ў спіс зверстваў, учыненых на еўрапейскай зямлі.
Савет Еўропы ўскладае на расійскія ўлады адказнасць "за зверствы, учыненыя ў той час, калі яны кантралявалі гэты раён".
Таксама ў заяве выказваецца салідарнасць з Украінай і гаворыцца пра паскарэнне працы над наступнымі санкцыямі супраць Расіі.
"Прэзідэнт Пуцін павінен неадкладна і безумоўна спыніць гэтую вайну", — адзначаюць у ЕС.
