Дзеля ўсяго чалавецтва. Гістарычная месячная місія "Артэміда-2" паспяхова завершана

11 красавіка ў 00:08 па Грынвічы касмічны карабель NASA "Арыён" з чатырма астранаўтамі на борце паспяхова прывадніўся ў Ціхім акіяне каля ўзбярэжжа Каліфорніі. Экспедыцыя "Артэміда-2" — першы за больш чым паўстагоддзя палёт людзей да Месяца — паспяхова завершана.

"Арыён" прывадніўся ідэальна, у NASA гэта назвалі "пасадкай па падручніку". Чацвёра астранаўтаў — "у выдатнай форме".

Прыкладна за 25 хвілін да ўваходу "Арыёна" ў верхнія слаі атмасферы Зямлі ад карабля аддзяліўся службовы модуль, у якім 10 дзён знаходзіліся ўдзельнікі місіі.

Яго разгарнулі такім чынам, каб увайсці ў атмасферу звыштрывалым цеплавым шчытом наперад. Хуткасць уваходу ў атмасферу была амаль 40 000 км/г. Цеплавы шчыт вытрымлівае тэмпературу да 5000 градусаў па Фарэнгейце (больш за 2700 па Цэльсіі).

Калі хуткасць знізілася з 40 000 км/г да сотняў кіламетраў у гадзіну, "Арыён" выпусціў першыя два тармазныя парашуты з дыяметрам купала ўсяго 7,6 метра. З іх дапамогай хуткасць падзення была зменшана да прыкладна 500 км/г.

Затым настала чарга дапаможных невялікіх парашутаў, якія выцягнулі тры асноўныя парашуты з дыяметрам купала ўжо больш за 35 метраў. На іх, на хуткасці каля 20 міль (больш за 32 км) у гадзіну, "Арыён" і "плюхнуўся" ў Ціхі акіян.

Прэзідэнт ЗША Дональд Трамп прывітаў вяртанне астранаўтаў на Зямлю і запрасіў іх у Белы дом.

"Віншую вялікі і вельмі таленавіты экіпаж “Артэміды II”. Увесь палёт быў захапляльным, пасадка — ідэальнай, і як прэзідэнт Злучаных Штатаў, я неверагодна ганаруся! З нецярпеннем чакаю сустрэчы з усімі вамі ў Белым доме ў бліжэйшы час. Мы паўторым гэта зноў, а затым наступны крок — Марс!" — напісаў Трамп у Truth Social.

Да экспедыцыі "Артэміда" вакол Месяца абляталі ўсяго 24 чалавекі — гэта былі астранаўты "Апалонаў", якія ляталі да спадарожніка Зямлі ў 1969–1972 гадах.

Цяпер людзей, якія бачылі Месяц зблізку, стала 28.