Дырэктара гаспадаркі пад Рагачовам, дзе галадаюць свінні, забралі сілавікі
Селекцыйна-гібрыдным цэнтрам "Зарэчча" пад Рагачовам зацікавіліся сілавікі. Гэта адбылося пасля таго, як у СМІ з'явіліся звесткі пра мор свіней, піша TUT.by са слоў работнікаў гаспадаркі.
"Прыехалі ўчора позна ўвечары, чалавек 20 міліцыянтаў і следчых. Усё кіраўніцтва і загадчыкаў выклікалі па тэлефонах, дапытвалі да ночы, а дырэктара павезлі", — распавядаюць работнікі "Зарэчча".
Праверка працягваецца і 29 траўня. Тэлефон дырэктара комплексу Віктара Мамурына адключаны, на працы яго няма.
Паводле інфармацыі TUT.by, праверкай у гаспадарцы займаецца аддзел па барацьбе з эканамічнымі злачынствамі (АБЭЗ) Гомельскай абласной міліцыі.
Напярэдадні работнікі СГЦ "Зарэчча" заявілі, што ў іх гаспадарцы ад голаду дохнуць свінні. Летась у выніку засухі выдаўся неўраджай збожжа, а закупіць кармы прадпрыемства не мела грошай. У выніку 60-тысячнае пагалоўе памірае з голаду.
Прадаць згаладнелых свіней на мяса таксама немагчыма: на мясакамбінаты не прымаюць тушы менш за 105 кг, а найбольшыя свінні з "Зарэчча" ледзь дацягваюць да 60 кг.
Па словах работнікаў, дырэктар гаспадаркі не вінаваты ў гэтай сітуацыі, бо працуе на пасадзе толькі пяць месяцаў — гэта значыць, што ён не ўдзельнічаў у нарыхтоўцы кармоў.
