Цыбін: Наступную “Рок-Каранацыю” я правяду ў Вялікім тэатры Оперы і Балета

Калі Еўрарадыё сабралося падвесці вынікі мінулай 29 лютага “Рок-Каранацыі 2007”, адзін з галоўных арганізатараў цырымоніі музычны партал “Тузін Гітоў” заявіў пра сваю адмову ў будучыні прымаць удзел у арганізацыі шоў. Пра гэта расказаў галоўны рэдактар “Слушнага парталу” Сяргей Будкін:

“Тузін гітоў” прыняў удзел у адраджэнні “Рок-каранацыі” ў 2005 годзе. Дагэтуль яна на праводзілася два гады. Мы правялі ўласна тры “Рок-Каранацыі”. Першая была прысвечаная “немінскім” музыкам, і на гэта рабіўся акцэнт; каб паказаць, што музычнае жыццё віруе не толькі ў сталіцы. Другая засведчыла, што існуе вельмі шмат накірункаў у беларускай музыцы, таму і былі ўведзены новыя, больш дробныя намінацыі. І вось трэцяя “Рок-Каранацыя” падвяла пэўную рысу, бо ў ёй прынялі ўдзел усе лепшыя. На нашу думку, цыкл завершаны, і правядзенне “Рок-Каранацый”, прынамсі, пры нашым удзеле губляе ўсялякі сэнс. Але ж, натуральна, ёсць і іншыя прычыны”.

Цікава, што Сяргей Будкін ужо не першы, хто за час правядзення “Каранацый” адмаўляецца прымаць у іх удзел. Еўрарадыё паразмаўляла з двойчы ўладальніцай тытула “Рок-Князёўна” Касяй Камоцкай, і высветліла, што вядомая беларуская рокерша ўжо некалькі гадоў не тусуецца на “Рок-Каранацыях”:

“Я не хажу на “Рок-каранацыі” па-просту з-за таго, што гэта мне не цікава. Я не бачу там аніякай інтрыгі, не бачу там аніякага сэнсу. І галоўнае, што я не бачу там новых асобаў”.

Аляксандр Куллінковіч, лідэр-вакаліст каранаванага ў пятніцу гурта Neuro Dubel спецыяльна для Еўрарадыё параўнаў сёлетнюю “Рок-Каранацыю” з папярэднімі. Спявак перакананы, што самымі вартымі “Рок-Кароны” былі ў гэтым годзе зусім не “Дзюбялі”:

“Паколькі я бачыў усе “Каранацыі” толькі з боку сцэны, то адрозненняў заўважыў няшмат, аднак яны ёсць. Першае, станоўчае, — гэта тое, што музыкі-выступоўцы маглі вольна перамяшчацца са сцэны ў залю і ў хол. На мінулах “каранацыях” гэтага не было, што вельмі абурала мяне і маіх калегаў. Што не спадабалася, дык гэта тое, што вельмі крыўдна за “Краму” і “Палац”. Я лічу, што гэта былі ня вартыя паводзіны арганізатараў. Я задаволены тым, што я атрымаў “Альбом года”, – гэта тое, чаго я жадаў. А вось з гуртом года… Я лічу, што гэтую “Карону” павінны былі атрымаць “Ляпісы.”

Аднак Юры Цыбін, нязменны арганізатар “Рок-Каранацыі”, лічыць, што галоўную ўзнагароду атрымалі тыя, хто гэтага сапраўды варты. А сёлетняя цырымонія была лепшай за ўсе гады існавання:

Цыбін: "З-за таго, што эмоцыі падчас канцэрту зашкальвалі, і мы сапраўды вызначылі “Рок-Каралёў”. Тая каманда, якая павінная была быць адзначаная, тая і атрымала “Рок-Карону”.

Да таго ж сёлетняя імпрэза настолькі спадабалася арганізатарам, што ў наступным годзе яны вырашылі дадаць “Рок-Каранацыі” яшчэ болей пафасу:

Цыбін: “Я правяду наступную “Рок-Каранацыю” ў Вялікім тэатры Оперы і Балета!”

Фота: Аляксандра Чалей, Андрэй Лянкевіч