Ці скідваюцца чыноўнікі на дабрачынныя дзіцячыя “ёлкі”?
Напярэдадні Калядаў і Новага года чыноўнікі традыцыйна выпраўляюцца ў дзіцячыя дамы, інтэрнаты і прыёмныя сем'і віншаваць выхаванцаў са святамі ў межах дабрачыннай акцыі "Нашы дзеці". З сабой вязуць падарункі: цукеркі і розныя неабходныя інтэрнатам рэчы.
Напрыклад, летась прэм'ер-міністр Андрэй Кабякоў "падчас дабрачыннай акцыі "Нашы дзеці" "перадаў Рэспубліканскаму рэабілітацыйнаму цэнтру для дзяцей-інвалідаў музычныя цэнтры". А за дзень да гэтай падзеі выйшла пастанова Саўміна №1074 "Аб выдачы бязвыплатнай (спонсарскай) дапамогі дзяржаўнай установе "Рэспубліканскі рэабілітацыйны цэнтр для дзяцей-інвалідаў". Атрымліваецца, падарункі Саўміна — гэта ніякая не дабрачыннасць, а проста "бязвыплатная дапамога" за кошт... дзяржбюджэту, то бок за грошы падаткаплатнікаў.
Сёлета прэм'ер-міністр яшчэ толькі збіраецца зрабіць "дабрачынны візіт" у адзін з дзіцячых дамоў у сталіцы, кажа прэс-сакратар прэм'ер-міністра Уладзіслаў Сычэвіч:
“Звычайна ў якасці падарункаў мы вязем тое, што просіць кіраўніцтва дзіцячага дома, апроч, натуральна, салодкіх падарункаў. У мінулым годзе падарылі акустычную сістэму".
Праўда, за якія грошы гэтым разам набыў Саўмін падарункі для дабрачыннай акцыі — бюджэтныя ці ўласныя (міністры ўзялі і скінуліся, гэта ж нармальна!), прэс-сакратар казаць адмаўляецца.
Міністр культуры Барыс Святлоў 22 снежня едзе ў падшэфную міністэрству Вілейскую школу-інтэрнат для дзяцей з парушэннямі слыху. У падарунак вязе некалькі тэлевізараў.
— Не за кошт бюджэту набываліся, — адказвае прэс-сакратар Мінкульта Ілона Немава на пытанне пра грошы, за якія куплялі тэлевізары.
Еўрарадыё: То бок вы скідваліся?
— Не, я гэтага не казала. Гэта не за кошт бюджэту адбываецца.
Цікавы дыялог! А вось супрацоўнікі Міністэрства юстыцыі з дабрачыннасцю знаёмыя:
"Канечне, такое бывае, і дастаткова часта, — распавядае прэс-сакратар Вольга Мурашкоўская. — Сёлета пакуль не скідваліся, хоць наша міністэрства і збіраецца паўдзельнічаць у акцыі "Нашы дзеці". Але ў нас ёсць яшчэ і прафсаюзныя ўзносы".
Па нашых назіраннях, чэмпіёнам па закупках навагодніх салодкіх падарункаў (каля 48 тысяч!) стаў Камітэт па адукацыі Мінгарвыканкама. Усе яны набытыя за сродкі горада для дзяцей-сірот і дзяцей са шматдзетных і апякунскіх сем’яў. Ёсць у Камітэта і “свая” ёлка для 14 дзетак:
“Ужо сёмы год мы ладзім нашу “камітэтаўскую” ёлку за свае сродкі для СПЦ Цэнтральнага раёна, — рапартуе намесніца начальніка аддзела выхаваўчай і ідэалагічнай работы Камітэта Надзея Вялікая. — Цяпер ва ўстанове знаходзіцца 14 дзяцей, і паедзем, павязём падарункі, набытыя не за дзяржаўныя сродкі, а за нашы ўласныя: мы складваліся і іх куплялі. Мы вывучалі, якога ўзросту дзеці, набывалі расфарбоўкі, кнігі для чытання, настольныя гульні, спартовы інвентар і слодычы”.
Дарэчы, калі Камітэт па адукацыі займае першае месца па колькасці набытых падарункаў для дзяцей, то Мінскі трактарны завод — сярод самых дарагіх падарункаў. Вага аднаго — каля двух кілаграмаў! І такіх холдынг, паводле сайта дзяржзакупак, набыў больш за 21 тысячу!
