Чыноўнікі адрэагавалі на скаргу пра тратуары, занятыя летнімі тэрасамі
10 дзён таму Еўрарадыё апублікавала тэкст пра тратуары, "захопленыя" летнімі тэрасамі мінскіх рэстаранаў. Незадоўга да таго блогер Антон Матолька, са свайго боку, звярнуўся ў адміністрацыю Ленінскага раёна Мінска з просьбай праверыць, ці на сваім месцы стаіць тэраса рэстарана "Café de Paris" па вуліцы Карла Маркса, 8. Па нашых вымярэннях, паміж вулічнай тэрасай і дрэвам рэстаран пакінуў усяго 57 см вольнага месца!
Фота: Еўрарадыё
З адказу, які атрымаў на свой зварот Антон Матолька, вынікае, што спецыялісты нядаўна агледзелі згаданую летнюю тэрасу і засведчылі адрозненні "ад раней узгодненай схемы яе размяшчэння". З адміністрацыі Ленінскага раёна ў рэстаран па вуліцы Карла Маркса накіравалі прадпісанне і абяцаюць трымаць сітуацыю на кантролі.
