Былога міліцыянта з Гомеля асудзілі на арышт за "зліў" дадзеных калег
Паводле версіі следства, экс-міліцыянт перадаў дадзеныя 27 калег / gomel.mvd.gov.by, фота носяць ілюстрацыйны характар
На тры месяцы арышту асудзіў суд Савецкага раёна Гомеля былога міліцыянта Уладзіміра Кашко, паведамляюць праваабаронцы.
Яго абвінавацілі ў "зліве" персанальных дадзеных 27 супрацоўнікаў міліцыі. Паводле версіі следства, ён перадаў гэтыя дадзеныя адміністратару Telegram-канала.
Абвінавачванне было выстаўленае па новым артыкуле КК РБ-203-1 "Наўмысныя незаконныя збор, прадстаўленне і распаўсюд інфармацыі аб прыватным жыцці і (або) персанальных дадзеных іншай асобы без яе згоды, якія пацягнулі нанясенне істотнай шкоды правам, свабодам і законным інтарэсам грамадзяніна". Гэты артыкул з'явілася ў Крымінальным кодэксе паўгода таму.
Былы міліцыянт таксама павінен выплаціць пацярпелым 13 600 рублёў — у якасці кампенсацыі маральнай шкоды.
