Бяссмертны: На фоне абвастрэння сітуацыі на Данбасе гаварыць няма пра што
![Бяссмертны: На фоне абвастрэння сітуацыі на Данбасе гаварыць няма пра што](/sites/default/files/styles/gallery_main/public/2023-08/0291caa-1.jpg.webp?itok=_3R8Hb8J)
Для таго, каб палітычным шляхам вырашыць канфлікт на ўсходзе Украіны, найперш неабходна вывесці расійскія войскі з Данбаса. Так прадстаўнік прэзідэнта Украіны Пятра Парашэнкі ў палітычнай падгрупе Кантактнай групы па вырашэнні канфлікту ва Украіне Раман Бяссмертны пракаментаваў Еўрарадыё сённяшнія перамовы ў Мінску.
Бяссмертны: “Ідзе цяжкая, руцінная праца. Але на фоне абвастрэння сітуацыі на лініі размежавання гаварыць няма пра што”.
Па словах былога амбасадара ў Беларусі Бяссмертнага, для яго сёння самае галоўнае — дамагчыся, каб у зоне канфлікту перасталі гінуць людзі.
Бяссмертны: “Але там ключом да ўсяго ёсць вывядзенне расійскіх войскаў, наёмнікаў расійскіх, расійскай зброі. Усе іншыя пытанні можна вырашыць. Увогуле, ва ўсіх іншых пытаннях я не бачу непераадольных праблем. Я магу сказаць, што да таго часу пакуль там стаяць два армейскія корпусы, падпарадкаваныя Генеральнаму штабу Расійскай Федэрацыі, у якіх камандаванне цалкам належыць расійскаму Генеральнаму штабу, кіраванне працэсам цалкам знаходзіцца ў руках Крамля. І гэта той выпадак, калі сама сітуацыя без рэгіянальнага, кантынентальнага і глабальнага кантэксту блізкая амаль да тупіковай”.
Тым не менш, кажа Бяссмертны, гэта не азначае, што працэс перамоваў трэба прыпыняць — ён проста патрабуе іншых кампанентаў. Якіх менавіта — пра гэта і шмат іншае чытайце праз пэўны час у эксклізіўным інтэрв’ю прадстаўніка прэзідэнта Украіны Пятра Парашэнкі ў палітычнай падгрупе Кантактнай групы па вырашэнні канфлікту ва Украіне Рамана Бяссмертнага.