Брастаўчаніна асудзілі за тое, што назваў кадэбіста "с*ыклом, чмом і ныцікам"
20 траўня суд Маскоўскага раёна Брэста прызнаў Уладзіміра Шурубейку вінаватым у абразе прадстаўніка ўлады (арт. 369 Крымінальнага кодэкса). Суддзя Яўген Брэган прысудзіў яму два гады абмежавання волі з накіраваннем у папраўчую ўстанову адкрытага тыпу ("хімія"), паведамляе праваабарончы сайт "Вясна".
У тэрмін адбытага пакарання брастаўчаніну залічаць тры дні, праведзеныя пад вартай, а таксама перыяд з 7 красавіка па 22 траўня, калі ён быў пад хатнім арыштам.
Паводле версіі следства, 22 верасня 2020 года Шурубейка ў адкрытым viber-чаце "Вычулкі.Ямна" размясціў паведамленне "з мэтай прычынення шкоды аўтарытэту дзяржаўнай улады і кіравання". Брастаўчанін напісаў пра супрацоўніка КДБ Дзяніса Сямёнава "с*ыкло, чмо і ныцік".
Сямёнаў таксама патрабаваў з мужчыны 2500 рублёў матэрыяльнай кампенсацыі. На судзе стала вядома, што пацярпелы ўжо атрымаў ад Шурубейкі 1500 рублёў і больш прэтэнзій не мае.
