Больш за палову беларускіх аўто ездзяць без тэхагляду

Больш за палову беларускіх аўто ездзяць без тэхагляду

Больш за палову зарэгістраваных у Беларусі аўтамабіляў ездзяць без пройдзенага тэхагляду. Пра гэта намеснік дырэктара УП "Белтэхагляд" Уладзімір Півульскі заявіў у перадачы "Галоўны эфір" на тэлеканале "Беларусь 1". Праграма выйшла ў эфір увечары 10 снежня. 

Сёлета з амаль трох мільёнаў аўтамабіляў, зарэгістраваных у Беларусі, да тэхагляду не даехала і палова. Многія аўтаўладальнікі не хочуць аплочваць дарожны падатак, які абыходзіцца даражэй, чым штраф за адсутнасць тэхагляду.

Па словах Півульскага, за 10 месяцаў 2017 года на тэхагляд прыбылі 1 мільён 325 тысяч аўтамабіляў. Прычым 215 тысяч не прайшлі тэхагляд з першага разу. Асноўная прычына, па якой аўтааматары атрымліваюць адмову ў праходжанні тэхагляду, — няспраўнасць тармазных сістэмаў. "Гэта больш за 50% усіх адмоваў пры праходжанні тэхагляду", — падкрэсліў спецыяліст. 

Атрымоўваецца, што больш за 100 тысяч аўто ў Беларусі пры тэхаглядзе мелі праблемы з тармазамі. А яшчэ каля 1,7 млн ​​аўто на станцыі тэхагляду проста не прыехалі. 

Дарэчы, як паведамляецца, два гады не праходзіў тэхагляд і ЗіЛ, які ўрэзаўся ў пешаходаў у Мінску на праспекце Пераможцаў каля гандлёвага цэнтра "Замак". Тады загінула 11-гадовая дзяўчынка, а чатыры чалавекі былі шпіталізаваныя. 

Мінскія ўлады зачынілі пераход каля ГЦ "Замак" і скасавалі прыпынак грамадскага транспарту побач з плошчай Дзяржаўнага сцяга. 

Аднак гэтая мера выклікала абурэнне ў мінчукоў. У інтэрнэце ўжо з'явілася здзеклівая петыцыя, якая патрабуе, каб гарадскія ўлады забаранілі аўтамабільны рух па праспекце Пераможцаў. 

Апошнія навіны

Галоўнае

Выбар рэдакцыі