#БНР100 і Курапаты, Кулінковіч, Марадона і боль Лукашэнкі. 2018 год у 18 фота

2018 год для Беларусі быў багатым на падзеі — добрыя і нечаканыя. Глядзім на галоўныя беларускія поспехі і расчараванні праз аб’ектывы фотакамер:

Дар’я Домрачава на фінішы біятлоннай эстафеты ў Пхёнчхане губляе сцяг Беларусі. Беларускі сенсацыйна выйгралі тую гонку. З Паўднёвай Карэі Домрачава вяртаецца першай у гісторыі чатарохразовай алімпійскай чэмпіёнкай па біатлоне, але ўжо праз чатыры месяцы са слязамі на вачах абвяшчае пра заканчэнне спартовай кар’еры.

100-годдзе абвяшчэння Беларускай Народнай Рэспублікі адзначылі вялікім канцэртам каля Опернага тэатра ў Мінску. Арганізатары заявілі пра 50 тысяч гледачоў. Некаторыя з іх былі затрыманыя на выхадзе з канцэртнай пляцоўкі, а дабро на шыльду ў гонар абвяшчэння БНР улады не даюць дагэтуль. Святочныя мітынгі, таксама як і затрыманні, 25 сакавіка прайшлі і ў рэгіёнах.

Удзельніцы “Матчынага руху-328” галадаюць, каб дамагчыся перагляду справу сваіх дзяцей, кінутых за краты на доўгія гады за наркатычныя злачынствы. Паралельна праходзілі галадоўкі ў Калінкавічах, Лідзе і ў вёсцы Востраў пад Мінскам. Актывісткі двойчы прыходзілі да Адміністрацыі прэзідэнта і спынілі галадоўку на 14-ы дзень, калі чыноўнікі паабяцалі, што падумаюць над змякчэннем пакаранняў за наркотыкі. У сустрэчы з Лукашэнкам жанчынам адмовілі.

“Міс Беларусь — 2018” стала Марыя Васілевіч з Мінска, 20-гадовая студэнтка БДЭУ. У снежні на міжнародным конкурсе прыгажосці “Міс Свету” Васілевіч увойдзе ў топ-5 і атрымае званне самай прыгожай дзяўчыны Еўропы.  

Беларускія хакеісты з лікам 0:4 прайгралі аўстрыйцам на Чэмпіянаце свету ў Даніі. Пасля разгрому наша каманда вылецела з элітнага дывізіёна ў першы, у якім не выступала з 2004 года.  

17 траўня, у міжнародны дзень барацьбы з гамафобіяй, вясёлкавы сцяг з’явіўся на будынку амбасады Вялікабрытаніі ў Мінску. Праз тры дні Міністэрства ўнутраных спраў выступіла з крытыкай аднаполых адносін, назваўшы іх “падробкай”. Заява ведамства атрымала шырокі розгалас у Беларусі і за мяжой, а партрэты міністра ўнутраных справу Ігара Шуневіча пачалі “гастраляваць” па гей-парадах у розных краінах. 

Падрыў аварыйнага моста праз Прыпяць. Летась па ім пайшла расколіна, з-за чаго рух па ім быў абмежаваны. Гарады Жыткавічы і Тураў апынуліся фактычна адрэзанымі адзін ад аднаго. Адноўлены мост адчынілі ў лістападзе, рамонт каштаваў 50 мільёнаў рублёў. Будаўнікі заявілі, што новы мост прастаіць "сто гадоў мінімум".

Пратэстоўцы не пускаюць аўтамабіль на тэрыторыю рэстарана “Поедем поедим”, пабудаванага побач з урочышчам Курапаты ля мінскай кальцавой дарогі. Актывісты  патрабуюць ліквідаваць забаўляльную установу, бо літаральна ў 50 метрах ад яе знаходзіцца месца сталінскіх расстрэлаў. Але міліцыя і суды як быццам падтрымліваюць уладальнікаў рэстарана. Міліцыянты рэгулярна затрымліваюць абаронцаў Курапатаў, а суды караюць іх штрафамі і суткамі арышту.

Украінскі спявак Alekseev прадставіў Беларусь на "Еўрабачанні". Выканаўца паказаў найгоршы вынік за час удзелу нашай краіны ў міжнародным конкурсе песні: ён заняў 37-е месца сярод 43 удзельнікаў.
 

Баявая машына пяхоты, якая рухалася ў складзе арганізаванай калоны, пасля заносу вылецела на сустрэчную паласу і змяла легкавік Volkswagen Polo. Аварыя адбылася каля вёскі Ласосна у прыгарадзе Горадні. Кіроўца легкавіка не пацярпеў, аднак яго машына атрымала сур'ёзныя пашкоджанні. Пазней ваенныя папрасілі прабачэння ў мужчыны і перадалі яму кампенсацыю за нанесеную шкоду.

Знакаміты аргенцінец Дыега Марадона наведаў Брэст. На пачатку ліпеня ён стаў старшынёй праўлення ФК "Дынама-Брэст", і ў гэтай якасці правёў прэс-канферэнцыю і наведаў матч чэмпіянату Беларусі. Фанаты вельмі спадзяваліся, што аргенцінец будзе трэніраваць брэсцкі клуб, але яго пасада апынулася прадстаўнічай. Ён вярнуўся на радзіму і ўладкаваўся ў мексіканскі футбольны клуб.

 

Будынак Міністэрства па надзвычайных сітуацыях падчас чарговага патопу на вуліцы Рэвалюцыйнай. У рамонт гэтай вуліцы і суседняй Камсамольскай гарадскія ўлады ўклалі больш за 1 мільён долараў. Але першы ж дождж затапіў вуліцы і заліў шматлікія кавярні.

Увечары 9 жніўня рэдактарка TUT.by Ганна Калтыгіна выходзіць з будынку Следчага камітэта, куды была дастаўленая для "неадкладных следчых дзеянняў" па "справе БелТА". У той дзень у офісах TUT.by, БелаПАН і іншых СМІ, а таксама ў кватэрах журналістаў, рэдактараў і іх сваякоў адбыліся вобшукі. Дзеянні сілавікоў былі непрапарцыйна жорсткімі, што дало падставы казаць пра спробу ціску на незалежную прэсу. Падазраванымі, а пасля і абвінавачанымі ў незаконным карыстанні платнай стужкай інфармагенцтва БелТА сталі 14 чалавек. Сёння ў справе засталася адна абвінавачаная — галоўная рэдактарка TUT.by Марына Золатава.

 

У канцы кастрычніка БРСМ пад крылом Міністэрства адукацыі святкаваў 100-годззе камсамольскага руху, пераемніцай якога лічыць сябе беларуская моладзевая арганізацыя. Афіцыйна гадавіна камсамолу адзначаецца 29 кастрычніка і супадае па даце з гадавінай страшных расстрэлаў 1937 года, калі ў ноч з 29 на 30 кастрычніка ў сутарэннях НКУС былі знішчаныя больш за сто прадстаўнікоў беларускай інтэлігенцыі. Але сённяшнім камсамольцам гэты факт не перашкаджае святкаваць.

Мітрапаліт Іларыён абвяшчае рашэнні Святога Сінода, які прайшоў у Мінску. Руская праваслаўная царква прыпыняе стасункі з Канстанцінопальскім патрыярхатам пасля таго, як Украінская праваслаўная царква атрымала аўтакефалію. Беларуская праваслаўная царква падтрымлівае рашэнне РПЦ.     

На канцэрт памяці лідара гурта Neuro Dubel Аляксандра Кулінковіча сабралося блізу тысячы гледачоў. Музыка памёр ў жніўні ад наступстваў пнеўманіі. Яму было 46 гадоў. Neuro Dubel паўплываў на некалькі пакаленняў сённяшніх беларусаў, а Саша Кулінковіч назаўжды застанецца легендай беларускай рок-музыкі.

Аляксандр Лукашэнка і Уладзімір Пуцін на саміце ЕАЭС ў Санкт-Пецярбургу. Падчас мерапрыемства кіраўнік Беларусі раптам пачаў спрачацца з расійскім прэзідэнтам пра цану за газ. Пазней Лукашэнка прызнаўся, што ў кулуарах Саміта прынёс Пуціну прабачэнні. 

БАТЭ з лікам 3:1 перамог грэчаскі ПАОК і святкуе выхад у плэй-оф Лігі Еўропы. У 1/16 фінала “жоўта-блакітныя” згуляюць з лонданскім "Арсеналам" — колішняй камандай паўабаронцы Аляксандра Глеба, які сёння абараняе колеры БАТЭ. Першы матч пройдзе 14 лютага на "Барысаў-Арэне", паядынак у Лондане — 21 лютага.