Беларускі баец ММА на грошы за выйграны турнір зладзіў свята ў дзіцячым прытулку
Беларускі баец змяшаных адзінаборстваў (ММА) Вадзім Куцы нетрадыцыйна патраціў грошы за выйграныя спаборніцтвы. Як піша tribuna.com, спартовец за паўтары хвіліны перамог іспанца Хаўера Фуэнтэса на турніры Academy MMA Cup у сваёй катэгорыі.
Ганарар за перамогу ён ахвяраваў у дзіцячы прытулак. Яму дапамаглі таксама знаёмыя ды іншыя спартоўцы. Свята для дзяцей з сацыяльнага прытулку Першамайскага раёна Мінска адбылося ў мінулую нядзелю.
Матывы свайго ўчынку Куцы патлумачыў так: "Па-першае, гэты прытулак праз дарогу ад залы, дзе я трэніраваўся ў дзяцінстве. Я восем гадоў туды хадзіў, бегаў там, гуляў, бачыў гэтых дзяцей і разумеў, што ім мала пашанцавала. Ну, і потым, як пасталеў, прыйшло жаданне дапамагчы. Па-другое, гэта быў мой першы бой у Мінску — раней біўся за мяжой, таму вырашыў, што калі дома выйграю, то аддам усё дзецям".
Па словах спартоўца, у прытулак перадалі тэлевізар, фотаапарат, караоке-сістэму, мікрафон з калонкамі, спартыўны інвентар, а таксама каля 100 кг садавіны і цукеркі. "Мы таксама дарылі кожнаму зімовы камплект адзення: шапка, куртка, швэдар, штаны, майка, пальчаткі... Плюс летні абутак: красоўкі або шлёпанцы. Цацка кожнаму ў падарунак, ну і шоў-праграма была: двух хаскі ўзялі, каб дзеці маглі нянькацца з імі, аквагрым быў, аніматар быў, клоўны і фокуснік. І адна дзяўчына бясплатна майстар-клас правяла", — распавёў Куцы пра свята для дзяцей.
Вадзіму Куцаму 26 гадоў, у ММА ён правёў 12 баёў, у 11 перамог.
