Беларусам давядзецца паставіць лічыльнікі вады і наняць домакіраўнікоў
Насельніцтва павінна
ўзяць больш актыўны ўдзел у эканоміі энергарэсурсаў. Такое меркаванне выказаў
міністр жыллёва-камунальнай гаспадаркі Уладзімір Белахвостаў.
Паводле яго слоў, плануецца на
працягу году ўсе кватэры абсталяваць
індывідуальнымі лічыльнікамі вады. Прынята рашэнне, што такія прыборы
грамадзяне змогуць устанаўліваць у растэрміноўку — прадпрыемствы ЖКГ будуць
прыцягваць крэдыты на гэтыя мэты.
Пры ўстаноўцы лічыльнікаў за ўласны кошт
жыхары атрымаюць 20% зніжкі па аплаце за ваду. Міністр таксама выказаў
меркаванне пра неабходнасць "даць кожнаму дому гаспадара — домакіраўніка". Ён
падкрэсліў, што амаль 83% кватэр жыллёвага фонду прыватызаваныя і грамадзянам неабходна вызначацца з формай
кіравання ў сваім доме.
