Баевікі "Стралка" зрабілі пераварот сярод данецкіх сепаратыстаў
Ранейшыя лідары адхіленыя ад кіраўніцтва Сяргеем Здрылюком (мянушка "Абвер" ці "Адлер"), "правай рукой" "Стралка", камандзіра баевікоў у Славянску.
Пра гэта інфармуе выданне "ОстроВ", якое спасылаецца на крыніцы сярод дзеячоў так званай "Данецкай народнай рэспублікі". Нібыта, у нядзелю "адбыўся пераварот". Яго ўчыніла "група людзей на чале з чалавекам, які прадставіўся памочнікам "Стралка" са Славянска" — Здрылюком (ураджэнцам Украіны, які мае расійскае грамадзянства; на здымку). Яны адхілілі ад прыняцця рашэнняў такіх дзеячоў, як Пургін, Лягін і Маковіч.
Сцвярджаецца, што людзі "Стралка" (Ігара Стралкова ці Ігара Гіркіна, СБУ лічыць яго афіцэрам расійскіх спецслужб) сілай прымусілі Рамана Лягіна неадкладна агучыць вынікі так званага "рэферэндума".
Фота — СБУ Украіны