Адразу 6 давераных асоб кандыдатаў у дэпутаты пазбавіліся рэгістрацыі

Рашэнне было агучана 19 сакавіка на паседжанні гарадской выбарчай камісіі. Са словаў незалежнага назіральніка Уладзіміра Вялічкіна, які прысутнічаў падчас абвяшчэння рашэння, сябры камісіі сапраўды мелі падставы забраць адпаведныя пасведчанні.

Вялічкін: "Іх пазбавілі рэгістрацыі даверанымі асобамі за тое, што яны парушылі частку 4-ю артыкула 76 Выбарчага кодэксу. Там сказана, што даверанымі асобамі кандыдата ў дэпутата не могуць быць кандыдаты ў дэпутаты".

Старшыня Брэсцкай абласной філіі Партыі БНФ Дзмітрый Шыманскі ў каментары Еўрарадыё назваў сітуацыю тэхнічнай памылкай. Дзейсны кандыдат у дэпутаты паведаміў, што партыйцы проста не ведалі такіх працэсуальных акалічнасцяў, як забарона кандыдатам быць даверанымі асобамі ў сваіх паплечнікаў.

Аднак брэсцкі палітык мяркуе, што такім чынам выбарчая камісія вырашыла адпомсціць за скаргу Партыі БНФ. На выбары ў гарадскі савет партыйцы вылучылі сем прадстаўнікоў. Аднак у афіцыйных звестках з'явілася інфармацыя толькі пра шэсць зарэгістраваных кандыдатаў. Гэта памылка і стала нагодай для скаргі ў вышэйшыя інстанцыі.

Фота — gorod.gomel.by