Абсталююць відэаназіраннем зялёныя зоны на ўскраінах Мінска
Кантроль за вуліцамі і плошчамі сталіцы / minsk.mvd.gov.by
Абсталююць відэаназіраннем зялёныя зоны на ўскраінах Мінска. Адпаведнае рашэнне прынялі ўлады сталіцы, у аўторак яно было апублікавана на Нацыянальным прававым інтэрнэт-партале.
Відэакамеры з'явяцца на экасцежцы каля Свіслачы ў парку паміж заапаркам і скрыжаваннем вуліц Убарэвіча і Галадзеда ў Чыжоўцы, у зоне адпачынку каля вуліцы Карзюкі ўздоўж паўднёвага берага Чыжоўскага вадасховішча, у парку ў Серабранцы каля канала Сляпянскай воднай сістэмы (ад вуліцы Ванеева да вуліцы Малініна, з боку вуліцы Гараўца), у парку Курасоўшчына ў межах вуліц Брэсцкай, Казінца і Каржанеўскага, у парку ў Сухараве ў межах вуліц Гарэцкага, Шамякіна і Мазурава, каля вадасховішча Дразды ў межах вуліцы Ціхая да моста цераз раку Свіслач.
Як вядома, усе камеры відэаназірання ў сталіцы падключаны да адзінай сістэмы маніторынгу грамадскай бяспекі. З канца мінулага года яна працуе "у новым фармаце". Сілавікі выкарыстоўваюць праграму распазнання твараў для пошуку праціўнікаў рэжыму.
