27-гадовага віцябляніна асудзілі на 12 гадоў за адміністраванне ТГ-каналаў
Вадзім Васільеў / t.me/viasna96
12 гадоў калоніі ўзмоцненага рэжыму і 16 000 рублёў штрафу (500 базавых) — такі прысуд атрымаў Вадзім Васільеў. 27-гадовага віцябляніна судзілі ў Мінскім гарадскім судзе, паведамляе праваабарончы цэнтр "Вясна".
Хлопца асудзілі па шасці артыкулах Крымінальнага кодэкса — нібыта за адміністраванне тэлеграм-каналаў "Віцебск 97%" і "Орша 97%".
Суд быў закрытым, таму падрабязнасці працэсу невядомыя. Прысуд вынесла суддзя Таццяна Фалькоўская.
Вядома, што Васільева затрымалі напрыканцы траўня 2022 года. Сілавікі знялі з ім відэа, у якім віцяблянін расказаў, што быў адміністратарам пратэсных чатаў і каналаў у жніўні 2020 года.
