23-гадовую гродзенку асудзілі на 12 гадоў за сэксуальны гвалт над сынам

Суд Ленінскага раёна Гродна прысудзіў 12 гадоў зняволення 23-гадовай гарадзенцы, якая ўчыніла сэксуальны гвалт да свайго малалетняга сына, піша Гродзенскі блог s13.

Відэафайл з дзіцячай парнаграфіяй у інтэрнэце знайшла летам 2015 года дацкая паліцыя. Мяркуецца, што распаўсюджваць яго пачаў жыхар Нямеччыны. А сам запіс быў зроблены праз Skype падчас сеансу сувязі з карыстальнікам з Гродна. Потым высветлілася, што гродзенскім абанентам была маладая дзяўчына, якая раней тройчы прыцягвалася да адміністрацыйнай адказнасці за занятак прастытуцыяй.

Судовае следства даказала, што маладая маці для атрымання грашовай узнагароды ад жыхара замежнай дзяржавы ўчыніла сэксуальны гвалт над сваім сваім малалетнім сынам, што дэманстравалася праз інтэрнэт-трансляцыю.

Акрамя гэтага, падчас расследавання крымінальнай справы выявілася, што жанчына мела дачыненне да несанкцыяванага доступу да асабістай інфармацыі трэціх асоб, а таксама замаху на несанкцыянаваны доступ да асабістай інфармацыі.

Маладую гродзенку прызналі вінаватай па некалькіх абвінавачаннях — гвалтоўныя дзеянні сэксуальнага характару, выраб і распаўсюд парнаграфічных матэрыялаў або прадметаў парнаграфічнага характару з паказам непаўналетняга, несанкцыяваны доступ да камп'ютарнай інфармацыі, замах на несанкцыяваны доступ да камп'ютарнай інфармацыі.

Па сукупнасці злачынстваў шляхам частковага складання суд прызначыў ёй 12 гадоў у папраўчай калоніі агульнага рэжыму з канфіскацыяй усёй маёмасці. Таксама суд спагнаў з жанчыны ўсю суму, атрыманую за трансляцыю дзеянняў сэксуальнага характару супраць яе малалетняга сына.

Пракуратура Гродна накіравала ў суд заяву, каб пазбавіць 23-гадовую гродзенку бацькоўскіх правоў.

Прысуд пакуль не набыў законную моц.

Фота: s13.ru